Azərbaycan Prezidenti İlham Əliyevin müsahibələri, regional və beynəlxalq məsələlər barədə fikirləri ərəb mediasının daim diqqətində olur. Dövlətimizin başçısının yerli televiziya kanallarına verdiyi sonuncu müsahibədə Azərbaycanın Yaxın Şərqdə hansısa fəaliyyətlərdə mümkün iştirakı ilə bağlı yayılmış xəbərlər barədə səsləndirdiyi fikirlərin nüfuzlu ərəb mediası tərəfindən geniş işıqlandırılması ölkəmizin mövqeyinin həmin regionun cəmiyyətlərində daim maraq kəsb etdiyinin bir daha göstərir. Eyni zamanda, xarici mətbuata yol tapmış və Azərbaycanın guya Qəzzada sülhməramlı kontingentin tərkibində iştirak edəcəyi ilə bağlı iddialara aydınlıq gətirir.
Göründüyü kimi, Azərbaycan dünyada davam edən münaqişələrlə bağlı beynəlxalq hüquqa əsaslanan mövqe sərgiləyir. Eyni zamanda, silahlı toqquşmalardan və təbii fəlakətlərdən əziyyət çəkən insanlara da humanitar yardımını əsirgəmir. Ölkəmiz bu kontekstdə Azərbaycan sülhməramlı əməliyyatlarda yalnız mandatın aydın, hüquqi və təhlükəsizlik baxımından təmin olunduğu hallarda iştirak edə bilər. Prezident İlham Əliyevin dediyi kimi, Azərbaycanın İraqda, buna qədər isə həm Kosovoda, həm də özlüyündə Əfqanıstanda sülhməramlı əməliyyatlarda iştirak etmək təcrübəsi vardır. Qeyd edək ki, Qəzza sektorunda isə hazırda belə bir şərtlər mövcud deyil və ölkə hərbi toqquşmalara cəlb olunmaq niyyətində olmadığını açıq şəkildə göstərir. Bu mövqe Azərbaycanın münaqişələrdə birbaşa hərbi tərəf kimi çıxış etməmək və riskləri minimuma endirmək siyasətinə uyğundur.
Bununla yanaşı, Azərbaycan humanitar məsuliyyətini ön planda saxlayır. Mülki əhalinin üzləşdiyi ağır şərait fonunda humanitar yardım göstərilməsi rəsmi Bakının beynəlxalq humanitar prinsiplərə sadiqliyini nümayiş etdirir və problemin hərbi deyil, insani tərəfinə diqqət çəkir.
Diplomatik müstəvidə Azərbaycan həm BMT-də, həm Qoşulmama Hərəkatında, həm də İslam Əməkdaşlıq Təşkilatında həmişə Fələstini və Fələstin dövlətinin yaradılmasını dəstəkləyib. Azərbaycanda ölkəmizin maliyyə yardımı ilə Fələstinin səfirliyi də fəaliyyət göstərir. Bütün bunlar bu dəstəyin praktik ifadəsidir.
Eyni zamanda, rəsmi Bakı Yaxın Şərqdəki mürəkkəb proseslərə ehtiyatla yanaşaraq hesab edir ki, ərəb ölkələrinin daxili və regional problemləri ilk növbədə ərəb dövlətlərinin özləri tərəfindən həll edilməlidir. Bu baxımdan Ərəb Dövlətləri Liqasının, eləcə də digər əsas regional aktorların mövqeləri həlledici əhəmiyyət daşıyır. Azərbaycanın bu balanslı yanaşması həm beynəlxalq nüfuzunu qorumağa, həm də regional sabitliyə töhfə verməyə yönəlib.
AZƏRTAC
jpg_1767867655.jpg)
jpg_1767211798.jpg)
