İşğaldan azad edilmiş ərazilərdə istehsal müəssisələrinin yaradılması, sahibkarlığın inkişafı, biznes mühitinin formalaşdırılması, əhalinin məşğulluğunun təmin edilməsi üçün məqsədyönlü addımlar atılır. Dövlətimizin başçısının 2021-ci ildə imzaladığı Fərmana əsasən yaradılan Ağdam Sənaye Parkının məqsədi də azad olunmuş ərazilərin dirçəldilməsi, Qarabağın sənaye potensialının inkişafı, sahibkarlığın dəstəklənməsi və əhalinin istehsal sahəsində məşğulluğunun artırılmasıdır.
AZƏRTAC-ın bölgə müxbiri xəbər verir ki, Ağdam Sənaye Parkında ümumi investisiyalarının həcmi 312,66 milyon manat olan 32 sahibkarlıq subyektinə rezidentlik, 5 sahibkara isə qeyri-rezidentlik statusu verilib. İnvestorlar tərəfindən Sənaye Parkına 142 milyon manat sərmayə yatırılıb,13 rezident fəaliyyətə başlayıb. Sənaye Parkında 970-ə yaxın daimi iş yeri yaradılıb.
Ağdam Sənaye Parkındakı müəssisələr Azərbaycan dövlətinin yaratdığı geniş iqtisadi imkanlar sayəsində uğurla fəaliyyət göstərir. Bir çox vətəndaş bu müəssisələrdə, öz doğma yurdlarında iş yerləri ilə təmin olunublar. Rezident müəssisələrə verilən vergi və gömrük güzəştləri regionda sənayenin canlanmasına şərait yaratmaqla yanaşı, məskunlaşan əhalinin sosial rifahının yüksəldilməsində və aktiv əmək fəaliyyətinə cəlb edilməsində həlledici rol oynayır. Bu nümunə dövlətin "Böyük Qayıdış" proqramı çərçivəsində təkcə yaşayış sahələrini deyil, həm də insanların gələcək inkişafını təmin edən güclü iqtisadi ekosistem qurduğunu bariz şəkildə nümayiş etdirir.
Sənaye Parkında fəaliyyət göstərən “Eel Electric” MMC kimi müəssisələr regionun iqtisadi dirçəlişinə və yerli əhalinin məşğulluğuna mühüm töhfə verir. Parkda tətbiq edilən güzəştlər və yaradılan müasir infrastruktur vətəndaşların öz doğma yurdlarında dayanıqlı iş yerləri və yüksək iş şəraiti ilə təmin olunmasına geniş imkanlar açır. Bu proses bölgədə məskunlaşan insanların sosial rifahını gücləndirməklə yanaşı, Qarabağın sürətli sənayeləşmə strategiyasının uğurla icra olunduğunu nümayiş etdirir.
MMC-nin texniki direktoru Ruslan Şıxəliyev bildirib ki, müəssisə sənaye və infrastruktur obyektləri üçün elektrik qurğularının layihələndirilməsi, istehsalı və təchizatı ilə məşğuldur: “Zavodda elektrik panelləri, paylayıcı qurğular, eləcə də transformator məntəqələri istehsalı olunur. Şirkət Azərbaycan ərazisində avtomobillər üçün şarj cihazlarının istehsalı ilə məşğul olan yeganə müəssisədir. Şirkətimiz 2024-cü ildən bəri azad olunmuş ərazilərin böyük hissəsini öz istehsal etdiyi məhsullarla təchiz edir. Zavodda 70 nəfərə yaxın işçi çalışır ki, onlardan 90-95 faizi yerli sakinlərdir”.
Zavodun əməkdaşlarından olan montajçı-elektrik Məhəmməd Cavadovla da söhbət edirik. O, gördüyü işdən məmnunluğunu ifadə edərək deyib: “Zavodda istehsal olunan aşağı və ortagərginlikli elektrik panellərinin, həmçinin 6, 10 və 35 kV gərginlikli elektrik yuvalarının və avadanlıqlarının montajında, sxem üzrə yığılmasında və təhlükəsizlik qaydalarına uyğun icrasında iştirak edirəm. İşimə məsuliyyətlə yanaşıram, texniki tələblərə uyğun təhlükəsizliyə ciddi riayət edirəm”.
Beləliklə, Ağdam Sənaye Parkında həyata keçirilən layihələr işğaldan azad edilmiş ərazilərin iqtisadi potensialının reallaşdırılmasına, sahibkarlığın gücləndirilməsinə və əhalinin dayanıqlı məşğulluğunun təmin olunmasına xidmət edir. Bu istiqamətdə görülən işlər Qarabağın sənaye mərkəzinə çevrilməsi baxımından mühüm əhəmiyyət daşıyır.
png_1768821314.png)
