Avropa İttifaqında (Aİ) elektrik enerjisi və təbii qazın qiymətləri 2026-cı ilin ilk yarısında ötən ilin eyni dövrü ilə müqayisədə ucuzlaşıb.
Avropa Statistika İdarəsinin məlumatına görə, Yaxın Şərqdəki gərginlik topdansatış qaz qiymətlərini artırmağa başlasa da, ilin ilk yarısında Aİ üzrə orta pərakəndə qiymətlər aşağı düşüb. Buna baxmayaraq, ölkələr arasındakı fərq hələ də çox böyükdür. Avropada 38 ölkə üzrə vergilər daxil 100 kVt/saat elektrik enerjisinin qiyməti Türkiyədə 6,6 avro, İrlandiyada isə 38,7 avro təşkil edib. Avropa İttifaqı üzrə orta qiymətin 28,3 avro olduğu bu siyahıda ən bahalı ölkələr İrlandiya, Almaniya, Belçika, Avstriya, İtaliya və İsveç, Aİ daxilində ən ucuz ölkə isə Macarıstan olub. Lakin ölkələrin alıcılıq qabiliyyəti nəzərə alındıqda, elektrikin əhaliyə ən baha Rumıniyada, Polşada və Çexiyada, ən ucuz isə İslandiya, Türkiyə, Malta və Macarıstanda başa gəldiyi məlum olur. İllik müqayisədə elektrik enerjisi ən çox Rumıniya, Türkiyə, İrlandiya və Finlandiyada bahalaşdığı halda, Danimarka müvəqqəti vergi endirimi hesabına qiymətləri aşağı sala bilib.
29 Avropa ölkəsinin göstəricilərinə əsasən, 2026-cı ilin ilk yarısında 100 kVt/saat təbii qazın qiyməti Gürcüstanda 1,6 avro, İsveçdə isə 22 avroya çatıb. Aİ daxilində orta qiymət 11 avro olmaqla, ən ucuz qaz Macarıstanda, ən bahalı isə İsveç, Niderland və Fransada qeydə alınıb. Yerli gəlirlər və qiymət səviyyəsi hesablandıqda qazın ən baha olduğu ölkə Şimali Makedoniya, ən ucuz olduğu ölkələr isə Macarıstan və Türkiyə olub. Ümumilikdə Aİ-də qaz qiymətləri 2025-ci ilin ikinci yarısı ilə müqayisədə orta hesabla 10,2 faiz ucuzlaşsa da, ittifaqın dörd böyük iqtisadiyyatı arasında illik müqayisədə qazın bahalaşdığı yeganə ölkə 3,7 faizlik artımla Fransa olub.
Təhminə VERDİYEVA,
“Azərbaycan”
31 - Copyjpg_1794009722.jpg)
314444444 - Copyjpg_1793831795.jpg)
