Azərbaycan Prezidenti İlham Əliyevin BMT-nin Nyu-Yorkdakı mənzil-qərargahında Avropa Şurasının Baş katibi Alen Berse ilə görüşü irəliyə doğru atılan mühüm addımdır.
Bu sözləri AZƏRTAC-a açıqlamasında amerikalı politoloq və beynəlxalq əlaqələr üzrə ekspert, Beynəlxalq Vergi və İnvestisiya Mərkəzinin enerji, inkişaf və təhlükəsizlik Proqramının icraçı direktoru, Atlantika Şurasının baş elmi işçisi Ariel Koen deyib. O, Azərbaycan ilə Ermənistan arasında münasibətlərlə bağlı proseslərdə Avropa Şurasının rolunun indiyədək yetərli olmadığını da diqqətə çatdırıb.
Sentyabrın 23-də BMT-nin Nyu-Yorkdakı mənzil-qərargahında Prezident İlham Əliyevlə görüşdə Avropa Şurasının Baş katibi Alen Berse Bakı ilə İrəvan arasında əldə olunan uğurlar münasibətilə Azərbaycan dövlətinin başçısını təbrik edib. Söhbət zamanı tərəflər ATƏT-in Minsk qrupunun fəaliyyətinin dayandırılması, Vaşinqton sammitində Azərbaycan ilə Ermənistan arasında münasibətlərin normallaşdırılmasına dair sazişin paraflanmasının, ABŞ Prezidenti Donald Trampın iştirakı ilə imzalanmış Vaşinqton Bəyannaməsinin əhəmiyyətini müzakirə ediblər. Bütün bunların regionda davamlı sülhün təmin olunması baxımından əhəmiyyəti qeyd olunub. Alen Berse Avropa Şurasının regional sülh gündəliyinə dəstəyini vurğulayıb.
Keçən ay Vaşinqtonda keçirilən üçtərəfli görüşdən danışan Ariel Koen bildirib ki, bu danışıqlar sülh prosesini yeni səviyyəyə qaldırır.
Rəsmi Bakının hazırkı addımlarının ölkənin sülhə tam hazır olduğunu bir daha nümayiş etdirdiyini qeyd edən ekspert ümidvar olduğunu bildirib ki, Azərbaycan ilə Ermənistan arasında sülh sazişi bu ilin sonunadək yekunlaşdırılacaq və imzalanacaq.
Amerikalı ekspert vurğulayıb: “Sülh yolunda çox az əsas maneə qalıb və mən əminəm ki, Ermənistan ərazisindən keçən TRIPP (Beynəlxalq Sülh və Rifah naminə Tramp Marşrutu və ya Zəngəzur dəhlizi – red.) tranzit dəhlizinin təfərrüatları tezliklə razılaşdırılacaq. Ermənistanın da Azərbaycanla, daha sonra Türkiyə ilə sülhün bağlanması üçün qanunvericiliyinə və konstitusiya müddəalarına dəyişiklik etmək üzrə lazımi addımlar atacağı gözlənilir”.
Onun sözlərinə görə, Bakı ilə İrəvan arasında sülh Cənubi Qafqazda potensial azad ticarət zonasına, nəqliyyat dəhlizlərinin və boru kəmərlərinin inkişafına, Mərkəzi Asiya və Avropa İttifaqı, eləcə də Türkiyə, Rusiya və İranla daha dərin əməkdaşlığa yol açır. Bu baxımdan, ekspert İran elitasının bir hissəsinin, yəni, İslam İnqilabı Keşikçiləri Korpusunun hələ də sülhə xələl gətirən anti-Azərbaycan mövqeyini davam etdirməsi ilə bağlı təəssüfləndiyini bildirib və əlavə edib ki, hətta onilliklər ərzində İslam Respublikası ilə yaxşı münasibətlər saxlayan Ermənistan belə bu destruktiv yanaşmanı bölüşmür.
Azərbaycanın Rusiya ilə münasibətlərinə gəlincə, Ariel Koen onların yaxşılaşacağına ümid etdiyini bildirib, lakin qeyd edib ki, ilk addımı Rusiya atmalıdır. Konkret olaraq, Moskva AZAL-ın vurulan təyyarəsində həlak olanların ailələrinə təzminat ödəməli və iyunun sonunda saxlanılan azərbaycanlıları azad etməlidir. Hər iki hadisəni pisləyən politoloq sivil dövlətlərin belə davranmadığını vurğulayıb.
Ekspert açıqlamanın sonunda bildirib: “Rusiya və Azərbaycan uzun müddətdir ki, çox yaxşı münasibətlər saxlayır və Moskva lazımi addımlar atarsa, indiki vəziyyət yaxşılaşa bilər. Hər şey Rusiyadan asılıdır, o, son vaxtlar həm Bakı, həm də İrəvanla münasibətləri korlamağa nail olub və bu, son dərəcə təəssüf doğurur”.
