Akkan Suver: Azərbaycan artıq regionun etibarlı tərəfdaşıdır  

Prezident İlham Əliyevin yerli televiziya kanallarına müsahibəsi Azərbaycanın təkcə Qafqazın deyil, eyni zamanda, bölgəmizin də sabitlik və sülh mərkəzi olmasını bir daha təsdiqlədi. Müsahibədə ölkənin xarici siyasəti, ölkələrarası iqtisadi və sosial əlaqələrinin gücləndirilməsi xüsusi qeyd edilərək, Azərbaycanın regionun etibarlı tərəfdaşına çevrildiyi vurğulandı. Qarabağ Zəfərinin beşinci ildönümündə keçirdiyi illik mətbuat konfransında 2025-ci ili dəyərləndirən Prezident İlham Əliyev Azərbaycanın sülhə verdiyi yüksək əhəmiyyəti və bu siyasətin davamlılığını gündəmə gətirdi.

Bu fikirləri AZƏRTAC-a açıqlamasında Mərmərə Qrupu Strateji və Sosial Araşdırmalar Vəqfinin rəhbəri professor Akkan Suver ifadə edib.

Bu gün Azərbaycanın inkişafının yüksələn xətt üzrə davam etdiyini xatırladan professor deyib: “Azərbaycanın müstəqilliyini dörddəbir əsr boyunca məhdudlaşdıran Minsk qrupunun ləğv edilməsi, Zəngəzur dəhlizi layihəsinin həyata keçirilməsi və Amerika Birləşmiş Ştatları ilə strateji tərəfdaşlıq şərtləri üzrə işlərin son mərhələyə çatdığı bir dövrdə Prezident İlham Əliyev 2025-ci ildə Azərbaycanın çoxsaylı beynəlxalq tədbirlərə ev sahibliyi etməsinin əhəmiyyətini də xüsusi olaraq vurğuladı. Ölkə Prezidenti ötən ili Azərbaycanın artan siyasi nüfuzunun dövrü kimi qiymətləndirərkən, aktiv, təşəbbüskar və çoxşaxəli siyasətini də səmimiyyətlə ortaya qoydu. O, günümüzdə beynəlxalq hüququn faktiki olaraq işləmədiyi bir şəraitdə təhlükəsizliyinin müdafiə və ədalət məqsədli ordu vasitəsilə təmin edilməsinin vacibliyini də gündəmə gətirdi”.

Zəfərdən sonra Qarabağda aparılan bərpa-yenidənqurma işlərini xatırladan Akkan Suver Azərbaycanın Orta Dəhliz və Zəngəzur dəhlizi vasitəsilə mühüm tranzit və logistika mərkəzinə çevriləcəyini bildirərək deyib: “Artıq Füzuli, Zəngilan və Laçında üç beynəlxalq hava limanı istifadəyə verilib. İnsanların artıq doğma yurd-yuvalarında məskunlaşmağa başlaması təkcə Azərbaycanın deyil, bölgənin inkişafı, inteqrasiyası və ən əsası sülh içində yaşaması üçün xüsusilə əhəmiyyət daşıyır”.

Prezident İlham Əliyevin müsahibəsində Qəzza məsələsi ilə bağlı ortaya qoyduğu prinsipial mövqeyin də təqdirəlayiq olduğunu vurğulayan professor sözlərinə belə davam edib: “Azərbaycanın Qəzzada baş verən prosesləri diplomatik yollarla izlədiyini bildirən Prezident İlham Əliyev bu problemin ərəb dövlətləri tərəfindən həll edilməli olduğunu vurğulayaraq, bu ölkələrin mövqelərinin bu məsələdə nəzərə alınmasının vacibliyini qeyd etdi. Mən bunu mühüm bir qiymətləndirmə hesab edirəm. Digər tərəfdən, Fələstinin Bakıda yerləşən səfirliyinin Azərbaycanın maliyyə dəstəyi ilə fəaliyyət göstərdiyini bildirən Prezident İlham Əliyev Azərbaycanın hansısa bir münaqişəyə qoşulmaq niyyətində olmadığını da qətiyyətlə bəyan etdi”.

Professor vurğulayıb ki, ABŞ və Çinlə qurduğu aktiv əlaqələr, Türk Dövlətləri Təşkilatı çərçivəsindəki mövqeyi ilə Azərbaycan Avrasiya coğrafiyasında öz yerini daha da möhkəmləndirib. “Bütün bunları bir cümlə ilə ümumiləşdirmək lazım gələrsə, Azərbaycan artıq regionun etibarlı tərəfdaşıdır”, - deyə Akkan Suver bildirib.