Bu yerli özünüidarəetmə qurumu vergi daxilolmaları üzrə kənd rayonları sırasında birincidir
Ölkədə aqrar sektorun inkişafında örnəyə çevrilən Ağcabədi sosial-iqtisadi həyatın digər sahələrində də uğurlara imza atır, mütərəqqi texnologiyaların, qabaqcıl təcrübənin, elmi yeniliklərin tətbiqini yaradıcılıqla təmin edərək Azərbaycandakı yüksəlişdən geri qalmır.
Rayon mərkəzi, kəndlər, qəsəbələr abad görkəmi ilə diqqət çəkir, məmnunluq doğurur. Şəhərin ən ucqar küçələrinə, kənd yollarına asfalt örtük salınır. Rayon sakinləri daha qazdan, sudan, işıqdan gileyli deyillər. Çünki dövlətin böyük və davamlı qayğısından hər evə, hər ailəyə pay düşür.
Son günlərini yaşadığımız 2025-ci il tarixə çevrilir. Bu il də Ağcabədinin sosial-iqtisadi həyatında qazanılmış nailiyyətlərlə yadda qalacaq. Cari il təsərrüfat, abadlıq-quruculuq işləri həyata keçirilmiş, əhalinin güzəranı yaxşılaşmış, məqsədyönlü qaydada yaradılmış sağlam mənəvi-psixoloji mühit sayəsində vətəndaş məmnunluğu təmin edilmişdir.
Rayonun ictimai-siyasi həyatında ən əlamətdar hadisələrdən biri haqqında söhbət açmaq istəyirik. İnkaredilməz reallıqdır ki, yerli özünüidarəetmə orqanı olan bələdiyyələrin fəaliyyətsizliyi çox zaman tənqid hədəfi olur. Dövlət səviyyəsində bələdiyyələrin işini canlandırmaq, onların səmərəli fəaliyyəti üçün münbit şərait yaratmaq, onlara zəruri qayğı və diqqət göstərmək Ağcabədi rayonunun timsalında öz gözləntilərini verir. Bələdiyyə idarəetməsində təmərküzləşmə, əvvəlki dövrə nisbətən iri bələdiyyələrin yaradılması real müsbət nəticələr verir. Əgər əvvəlki dönəmdən Ağcabədidə 41 bələdiyyə vardısa, ötən seçkilərdən sonra onların sayı 15-ə enmişdir. Əvəzində bələdiyyə qurumları vasitəsilə əhaliyə göstərilən müxtəlif xidmətlərin keyfiyyəti xeyli yaxşılaşmışdır.
Ağcabədi bələdiyyəsi rayon mərkəzi ilə yanaşı, Şənlik, Nəcəfqulubəyli və Aşağı Avşar kəndlərini əhatə edir. Bu yaşayış məntəqələrində 52 min nəfər yaşayır. Az deyil, ölkəmizdə bəzi rayonların əhalisi təxminən bu qədərdir.
Müdriklər "elin gözü tərəzidir" deyiblər. Ötən il bələdiyyə seçkilərində Ağcabədi bələdiyyəsinə namizədlər haqqında səslənən bəzi fikirlərin qərəzli və subyektiv olduğunu ən böyük hakim olan zaman təsdiqlədi. O vaxt müxalif mövqedən çıxış edənlər bu gün elin-obanın məmnunluğunu görüb səhvlərini etiraf edir, xalqın seçiminə hörmətlə yanaşırlar. Sıradan sadə bir faktı xatırlamaq yerinə düşər. Ötən bələdiyyə seçkiləri ərəfəsində Şənlik kəndindən şəhid atası Qənbər Ağayev də namizədliyini irəli sürmüşdü. Hər zaman ara qarışdırıb bulanıq suda balıq tutmağa adət etmiş bir qrup bələdiyyə sədri olmağın məhz onun haqqı olduğunu ictimai yerlərdə, sosial şəbəkələrdə uca səslə, həm də israrla bildirir, seçkilərdə guya demokratik prinsiplərin pozulduğunu dönə-dönə vurğulayırdı. Amma həyata sərraf gözü ilə baxan el-oba seçimində yanılmadı. Sonda bu vəzifəyə layiq olan namizəd qazandı. Bu yaxınlarda Ağcabədi Rayon İcra Hakimiyyəti başçısının ərazidə keçirdiyi səyyar qəbulda söz alıb danışan Şənlik kənd sakini şəhid atası Qənbər Ağayev dedi ki, camaatımız Ağcabədi bələdiyyəsinin işindən çox razıdır. Sağ olsunlar, hər sözümüzə qayğı ilə yanaşırlar.
Ağcabədi bələdiyyəsi cari ili üz ağlığı ilə başa vurur. İl ərzində bələdiyyə fəaliyyətinin əsas istiqaməti şəhid ailələrinə, qazilərə, aztəminatlı ailələrə davamlı qayğını təmin etməkdən ibarət olmuşdur. Faktlara nəzər salaq. Qurban bayramı münasibətilə 20 şəhid ailəsinə ərzaq bağlaması çatdırılmışdır. İki aztəminatlı ailəyə yas mərasimi üçün maddi yardım edilmişdir. Ali məktəbə qəbul olmuş iki aztəminatlı ailənin övladının hər birinə 1000 manat hədiyyə edilmiş, yeni dərs ili ərəfəsində 25 aztəminatlı ailənin uşaqlarına məktəbli forması, ayaqqabı, çanta və digər məktəb ləvazimatları verilmişdir. 8 Noyabr - Zəfər Günü ərəfəsində isə 22 şəhid ailəsinə bayram sovqatı çatdırılmış, bələdiyyənin vəsaiti hesabına şəhid analarının Qəbələ şəhərinə səfəri təşkil olunmuş, Beynəlxalq Əlillər Günü münasibətilə 33 nəfər əlilə maddi yardım edilmişdir.
2025-ci ilin nəticələri sırasında abadlıq-quruculuq işləri də geniş yer alır. Şəhərdəki iki körpü əsaslı təmir edilmiş, əlavə bir körpü inşa edilib əhalinin istifadəsinə verilmişdir. Bələdiyyənin balansında olan 6 qəbiristanlıq il ərzində iki dəfə təmizlənmiş, əraziləri abadlaşdırılmışdır. Bu tədbirlər təbii ki, əhali tərəfindən minnətdarlıqla qarşılanmışdır. İl ərzində həmçinin yol infrastrukturunun yaxşılaşdırılması sahəsində də xeyli iş görülmüşdür. Şənlik kəndində və şəhər ərazisində bəzi ara yollara çınqıl döşənmişdir.
Cari ilin 11 ayı ərzində Ağcabədi bələdiyyəsi 800 nəfərdən çox vətəndaşı qəbul etmişdir. Onların təklif və müraciətlərinə həssaslıqla yanaşılmış, "Xalq üçün, xalqa xidmət naminə" prinsipi əsas götürülmüşdür.
Ağcabədi bələdiyyəsinin sədri İsmayıl Rəsulov illərin ayrıcında fikirlərini bizimlə də bölüşdü: "Başa çatmaqda olan 2025-ci ilin uğurları çoxdur. Amma əsas odur ki, əhalinin böyük əksəriyyəti fəaliyyətimizdən razıdır. Çalışırıq ki, əhaliyə nümunəvi xidmət edək, onlarda məmnunluq yaratmağa nail olaq. Yadda qalan, minnətdarlıq doğuran işlərimiz çox olsa da, görüləsi işlərimiz də az deyil. Yeni ildə kommunal xidmətlərin təşkilində bir sıra yeniliklər etməyi nəzərdə tuturuq. Bir vacib məsələ isə bələdiyyə torpaqlarının alqı-satqısının təkmilləşdirilməsidir. Bu olarsa, büdcəmiz daha da böyüyər. Bu ilin 11 ayı ərzində ölkə üzrə şəhər bələdiyyələrinin (Bakı və Sumqayıt istisna olmaqla) vergi daxil olması üzrə artım göstəricilərində birinci yerdəyik. Keçən illə müqayisədə 6 dəfə artıma nail olmuşuq. Əsas hədəfimiz yeni ildə yeni istehsal sahələri yaratmaq, əhalinin faydalı məşğulluğunu təmin etməkdir".
Lazım QULİYEV,
"Azərbaycan"
jpeg_1765922551.jpeg)
