İnsanın arzuları uşaqlıq illərinin saf, təmiz dünyasında doğulur və o, böyüdükcə taleyinə çevrilir. Ağ xalat geyinmək, insanların sağlamlığının keşiyində dayanmaq, bir ürəyin yenidən döyünməsinə, bir gözün yenidən ümidlə açılmasına səbəb olmaq arzusu adi bir peşə seçimi deyil, ilahi bir missiyadır.
İnsana ömrü Allah bəxş edir, lakin o ömrün sağlam, ağrısız davam etməsi üçün çalışan məhz həkimlərdir. Təsadüfi deyil ki, xəstə həkimin şəfqət dolu münasibətindən həyat eşqi, gülümsər baxışından təsəlli, qayğıkeş sözlərindən güc alır. Elə anlar olur ki, bir həkimin səmimi rəftarı, əlini xəstənin çiyninə qoyaraq dediyi "hər şey yaxşı olacaq" kəlməsi ən təsirli dərmandan da güclü olur. Bəzən saatlarla, bəzən də günlərlə ağır xəstənin başı üstündə dayanan, yorğunluğunu həyata qaytardığı xəstənin baxışlarında unudan həkim, əslində, təkcə müalicə etmir, mərhəmətli, qayğıkeş rəftarı ilə xəstənin ürəyində ümid çırağı yandırır. Xəstə düşdüyü mərəz ilə uzun mübarizədən sonra gözlərini açanda ilk gördüyü onu müalicə edən həkimin sevincdən parıldayan qayğılı gözləri olur. Və o an həkimin gülümsər, işıqsaçan baxışı xəstənin qəlbinə süzülərək ona sanki yenidən yaşamaq haqqı qazandırır.
Belə bir müqəddəs yolun yolçusu olan gənc həkimin hekayəsi isə təkcə bir insanın peşə seçimi deyil, uşaqlıq arzularının gerçəkləşməsidir. Həmin həkim Xanım Əliyevadır. O, Gəncədə dünyaya göz açıb. Orta təhsilini isə Bakı şəhərindəki 3 saylı tam orta məktəbdə alıb. Təhsil aldığı illərdə dərslərinə məsuliyyətlə yanaşan, xüsusilə biologiya və insan anatomiyasına böyük maraq göstərən Xanım Azərbaycan Tibb Universitetinin Pediatriya fakültəsinə daxil olub. Universiteti başa vuran Xanım Əliyeva Şüa diaqnostikası üzrə internaturanı tamamlayandan sonra həkim kimi fəaliyyətə başlayıb.
Xanım həkimlə çalışdığı Hacıqabul Rayon Mərkəzi Xəstəxanasının Şüa diaqnostika şöbəsində görüşdük. Xəstəxananın dəhlizinə daxil olan kimi ilk diqqəti çəkən məqam otağının qarşısındakı uzun növbə oldu. Bu növbə bir həkimə olan etimadın və inamın sübutu idi. Növbə gözləyən insanların söhbətlərindən "Xanım həkim diqqətlidir, hər şeyi ətraflı izah edir, xəstəyə doğması kimi yanaşır" sözlərini eşitdik. Onlar həkimin bilik və bacarığından, dəqiq diaqnoz qoymaq qabiliyyətindən, ən əsası isə xəstəyə göstərdiyi qayğıkeş münasibətindən razılıqla danışırdılar. Bu məmnunluq səmimi idi, süni təşəkkür ifadəsi yox, insanın içindən gələn minnətdarlıq idi. Bu etimadı gənc bir həkimin qısa zamanda qazandığı ən böyük uğur kimi qəbul etmək olar.
Xanım Əliyeva 2023-cü ildən Hacıqabul Rayon Mərkəzi Xəstəxanasında Şüa diaqnostika şöbəsinin müdiri və həkim-radioloqudur. O, Azərbaycan və Avropa Radioloqları cəmiyyətlərinin, AFERG-in, ASVXM-in və Woman Health Centerin həqiqi üzvüdür. Deyir ki, bu cəmiyyətlərdə iştirakı ona beynəlxalq təcrübəni izləmək, yeni diaqnostik yanaşmaları öyrənmək və onları gündəlik tibbi praktikada tətbiq etmək imkanı verir.
Xanım Əliyeva öz üzərində çalışmağı, tibb elminin son yeniliklərini öyrənib tətbiq etməyi çox sevir. Elmi fəaliyyətə xüsusi önəm verən həkim iki elmi tezisin müəllifidir. Bu haqda danışarkən deyir: "I Milli Süd Vəzi Xəstəlikləri Konqresində Süd vəzi xərçəngi, Yarımçıq Doğulmuş Körpələr Gününə və Uşaqlıq boynu xərçəngi ayına həsr olunmuş maarifləndirici seminarlarda təlimçi-spiker kimi iştirak etmişəm, çünki bu mövzular cəmiyyət üçün həyati əhəmiyyət daşıyır".
Onun fəaliyyətində TƏBİB-in xətti ilə 10 rayonda aparılan 1500-dən çox səyyar mammoqrafiya müayinəsinin nəticələrinin raporlanması xüsusi yer tutur. Gənc həkim vurğulayır: "Bu, statistik rəqəm kimi görünsə də, əslində, minlərlə qadının taleyi, minlərlə ailənin gələcəyi deməkdir. Burada əsas məqsəd xəstəliklərin erkən mərhələdə aşkarlanmasına töhfə vermək və qadınların sağlam gələcəyinə dəstək olmaqdır".
Müasir dövrdə tibbin yalnız xəstəxana divarları ilə məhdudlaşmadığını deyən Xanım Əliyeva sosial şəbəkələrdən də fəal istifadə edir. Onun fikrincə, məlumatlı pasiyent - sağlam cəmiyyət deməkdir. O, erkən diaqnostikanın əhəmiyyətini xüsusilə qabardır və vurğulayır ki, vaxtında aparılan müayinə bir çox xəstəliyin tam sağalmasına imkan yaradır. Hamiləlik dövründə müayinələrin əhəmiyyətinə xüsusi diqqət çəkən radioloqun sözlərinə görə, bu mərhələdə aparılan diaqnostika təkcə dölün deyil, ananın da sağlamlığını tam şəkildə qiymətləndirməlidir. "Sağlam ana - sağlam övlad deməkdir", - deyə o bildirir.
Söhbətimizin sonunda isə onun həkimlik fəlsəfəsi aydın şəkildə formalaşır: "Mənim üçün həkimlik, sadəcə, bir peşə deyil, həm də həyatdakı missiyamdır. Yaxşı həkim olmağın sirri pasiyentlə empatiya qurmaq, hər zaman əlçatan olmaq və durmadan öz üzərində çalışmaqdır. Radiologiya tibbin görən gözüdür və düzgün diaqnoz müalicənin yarısıdır".
Xanım Əliyevanın sözlərində həm peşəkar əminlik, həm də daxili məsuliyyət hissi var. Hiss olunur ki, qarşıdakı illərdə də o, seçdiyi bu müqəddəs yolun yolçusu kimi xalqına faydalı olmağı özünə borc biləcək.
Bu gün Hacıqabul xəstəxanasının dəhlizində növbə gözləyən insanlar üçün Xanım həkim, sadəcə, bir radioloq deyil, həm də ümidin ünvanıdır. Xanım həkim üçün ağ xalat məsuliyyət, şəfqət və insan həyatı deməkdir. Həkimlik onun üçün peşə yox, vicdan məsələsidir. Və belə vicdanla çalışan həkimlərin olduğu cəmiyyətdə sağlam gələcəyə inam daha möhkəm olur. Xanım Əliyeva seçdiyi bu müqəddəs peşənin bir həqiqətini də hər gün fəaliyyəti ilə sübut edir: insan həyatına toxunan həkim əlləri, əslində, gələcəyə işıq yandırır.
Elşən QƏNİYEV,
"Azərbaycan"
jpg_1770119508.jpg)
