"Azərbaycanın beynəlxalq aləmdə nüfuzu artdıqca dünyanın böyük və güclü dövlətləri ölkəmizlə siyasi, iqtisadi əlaqələr qurmağa böyük maraq göstərirlər.  Avropa İttifaqına daxil olan bir çox dövlətlə Azərbaycan arasında sıx münasibətlər mövcuddur".  

Bu fikirləri "Azərbaycan" qəzetinə Bakı Dövlət Universitetinin kafedra müdiri, professor Kamilə Əliyeva deyib. O bildirib ki, Qərbi Avropa dövlətləri arasında da ölkəmizlə siyasi, iqtisadi  əlaqələr qurmaq istəyən ölkələrin sayı artmaqdadır. Almaniya Federativ Respublikası bu ölkələrdəndir. Almaniya ilə Azərbaycan arasında əlaqələrin tarixi kökləri mövcuddur. Hələ 1867-ci ildə Almaniya Azərbaycanda mis yataqlarının istehsal edilməsində, eləcə də kənd təsərrüfatının inkişaf etdirilməsində böyük rol oynayıb. Azərbaycan müstəqilliyini bərpa etdikdən sonra Almaniya Azərbaycanla diplomatik əlaqələr quran ilk Avropa dövlətlərindən olub. Ölkələrimiz arasında iqtisadi əlaqələr yüksək səviyyədədir. Azərbaycanla Almaniya arasında 2020-2024-cü illərdə ticarət dövriyyəsinin ən aşağı həddi bir milyard ABŞ dolları üzərində olub. "Bütün bunlara baxmayaraq, Almaniyanın Azərbaycana qarşı siyasi baxışlarında fərqlilik sezilib. Burada, əlbəttə ki, Fransa amili mühüm rol oynayıb. Almaniya ilə Fransa arasında qarşılıqlı sıx əlaqələr buna öz təsirini göstərib. Ancaq qeyd etmək lazımdır ki, Almaniya Avropa İttifaqının iqtisadi güc mənbəyi hesab olunur", - deyə o əlavə edib. 

Ekspert qeyd edib ki, Azərbaycan müasir dünyada istər siyasi, istərsə də iqtisadi cəhətdən güclü dövlət olduğu üçün Almaniya ölkəmizlə sıx əlaqələr qurmağa  təşəbbüs göstərib: "Almaniya Federativ Respublikasının Prezidenti Frank-Valter Ştaynmayerin aprelin 2-də Azərbaycana rəsmi səfəri iki ölkə arasında iqtisadi, siyasi əlaqələri yeni mərhələyə yüksəldəcək. Səfər çərçivəsində Prezident İlham Əliyev və Almaniya Prezidenti Ştaynmayer mətbuata bəyanatla çıxış etdilər. Görüşdə əsas məsələ kimi Azərbaycanla Ermənistan arasında münasibətlər, eləcə də Azərbaycanla Almaniya arasında iqtisadi, siyasi əlaqələrin gücləndirilməsi müzakirə olundu. Dövlətimizin  başçısı çıxışında həm Almaniya, həm də Avropa ictimaiyyətinin marağına səbəb olan bir sıra mesajlar verdi. Azərbaycanla Almaniya arasında ticarət dövriyyəsinin bu ilin yanvar-fevral aylarında təxminən 3 dəfə artması gələcəkdə iqtisadi əlaqələrin daha da yüksələcəyindən xəbər verir. Azərbaycanın Almaniyaya xam neft ixrac etməsinin və istehsal edilən "yaşıl enerji"nin də gələcəkdə Almaniyaya ixracını nəzərə alsaq, demək olar ki, ölkəmiz Almaniyanın enerji təhlükəsizliyində mühüm rol oynayacaq. 

Prezident İlham Əliyev Azərbaycanla Ermənistan arasında sülh müqaviləsinin bağlanmasının təşəbbüskarının məhz Azərbaycan olduğunu Almaniya Prezidentinin nəzərinə çatdırdı. Ermənistan isə dünyaya özünü sülh tərəfdarı kimi nümayiş etdirsə də, bu prosesi uzatmaq niyyəti güdür". 

K.Əliyeva vurğulayıb ki, əgər Ermənistan sülh istəyirsə, ilk növbədə ATƏT-in Minsk qrupunun ləğv edilməsi ilə bağlı Azərbaycanın təklifini  qəbul etməli və öz konstitusiyasında dəyişiklik edərək Azərbaycana qarşı ərazi iddiası maddəsini çıxarmalıdır. Ölkəmiz BMT-nin qətnamələrinə uyğun olaraq öz torpaqlarını hərbi və siyasi yolla azad etdi ki, bu həm də beynəlxalq hüququn bərpası idi. İndi Minsk qrupunun fəaliyyətinə heç bir ehtiyac qalmayıb. 

Ekspert düşünür ki, Ştaynmayerin çıxışında hər zaman Azərbaycanın ərazi bütövlüyünü və suverenliyini tanıdığını və Almaniya dövlətinin Qarabağı Azərbaycanın ərazisi kimi qəbul etdiyini vurğulaması ölkəmizə qarşı olan bir sıra dövlətlərə də mesaj idi. Almaniya başa düşür ki, Azərbaycan dünya üçün çox önəmli bir ölkədir. Prezident İlham Əliyev tərəfindən ölkəmizdə yaradılan nəqliyyat, logistika infrastrukturu istər Avropa, istərsə də Asiya dövlətlərinin iqtisadi inkişafına böyük töhfələr verəcək.

Kafedra müdirinin fikrincə, Almaniya da Orta dəhlizin bir hissəsi olan Zəngəzur dəhlizinin açılmasında maraqlıdır: "Zəngəzur dəhlizinin açılması Almaniyanın Asiya dövlətləri ilə iqtisadi, ticari əlaqələrinə böyük töhfələr verə bilər. Bu da son dövrlər  zəifləyən Almaniya iqtisadiyyatının güclənməsinə imkan yaradar. Bu görüş bir daha sübut etdi ki, Prezident  İlham Əliyevin uğurlu daxili və xarici siyasəti nəticəsində dünyanın iqtisadi və siyasi güc mərkəzləri Azərbaycanla hesablaşır və bu siyasəti dəstəkləyirlər".

Əsmər QARDAŞXANOVA,

"Azərbaycan"