Amerikalıların sağlamlığının keşiyində türkəsilli professor duracaq

ABŞ Senatı Prezident Donald Tramp tərəfindən "Medicare" və "Medicaid Services" (CMS) mərkəzlərinin direktoru vəzifəsinə irəli sürülən türk kardiocərrah Mehmet Özün namizədliyi təsdiqlənib. Senatda keçirilən səsvermə zamanı 53 millət vəkili Özün namizədliyinin lehinə, 45-i isə əleyhinə səs verib.

Yaşlılara və aztəminatlı əhaliyə səhiyyə xidməti göstərən ölkənin aparıcı qurumlarına rəhbərlik edəcək Öz bu vəzifəyə təyin olunan ilk türkdür.

ABŞ-də "Medicare" 65 yaşdan yuxarı insanlara tibbi xidmət göstərən federal tibbi sığorta proqramıdır. Öz növbəsində "Medicaid Services" yoxsulların, əlillərin, aztəminatlı ailələrdən olan uşaqların və digər sosial cəhətdən həssas şəxslərin tibbi xərclərini ödəməyə kömək edən birgə federal və əyalət Amerika səhiyyə proqramıdır.

CMS 160 milyon amerikalının illik xərcləri 1 trilyon dollardan çox olan tibbi sığortanı həyata keçirir. Amerika mediası yazır ki, Özün CMS direktoru vəzifəsinə təyin edilməsi, Tramp dövründə həyata keçirilən federal ixtisarlar çərçivəsində sağlamlıq proqramları üçün çətin bir dövrə  təsadüf edir. Belə ki, CMS səhiyyə xərclərini azaltmaq səyləri çərçivəsində 300-ə yaxın iş yerini ixtisar etməyi planlaşdırır. Keçən ay Senatın Maliyyə Komitəsi qarşısında verdiyi ifadədə Öz ABŞ-də sağlamlıq sığortası proqramlarının canlılığının təmin edilməsinin vacibliyini vurğulayıb.

Mehmet Öz 1960-cı ildə Amerikanın Ohayo ştatında Türkiyədən gələn çərkəz mühacirlərin ailəsində anadan olub. 1955-ci ildə atası Mustafa Öz ABŞ-də təhsilini və praktikasını davam etdirməsinə imkan verən qrant alıb. Mehmetin anası Suna Öz İstanbuldakı əczaçı ailəsindən idi.

Mehmet Öz Harvard Universitetini bitirib və Pensilvaniya Universitetində doktorluq dərəcəsi alıb. 2001-ci ildən o, Kolumbiya Universitetində cərrahiyyə şöbəsinin müdiridir və Nyu Yorkdakı Presviterian Xəstəxanasında dərs deyir. Həmçinin o, 6 mövsüm "The Oprah Winfrey Show"da aparıcı sağlamlıq eksperti kimi çalışıb, "Discovery Channel" telekanalında baş tibbi məsləhətçi vəzifəsində işləyib. 2009-cu ildən 2022-ci ilə qədər  özünün "The Dr. Oz Show" adlı televiziya şousunda aparıcılıq edən Öz 9 dəfə "Daytime Emmy" mükafatı alıb və Hollivud Şöhrət Xiyabanında  ulduz sahibi olub. 2018-ci ildə o, Donald Tramp Administrasiyası yanında İdman, Fitnes və Qidalanma Şurasının üzvü olub. 2022-ci ildə Pensilvaniyadan ABŞ Senatına namizədliyini irəli sürüb, lakin seçkidə məğlubiyyətə uğrayıb.

Ailəlidir, Dafni, Oliver Mustafa, Arabella Sezen  və Zoi Yasemin adlı dörd övladı var. Donald Trampın dediyinə əsasən, "Amerikanı yenidən sağlam etmək üçün doktor Mehmet Öz qədər ixtisaslı və bacarıqlı heç bir həkim ola bilməz".

R.HİLALOĞLU,

"Azərbaycan"