Analoji Rusiya-Çin layihəsinə artıq 13 ölkə qoşulub
ABŞ-nin nəqliyyat naziri və ABŞ Milli Aeronavtika və Kosmik Tədqiqatlar İdarəsinin (NASA) rəhbəri vəzifəsini icra edən Şon Daffi bu həftə Ayda nüvə reaktorunun qurulması proqramını sürətləndirmək planlarını açıqlamağı planlaşdırır. Bu barədə “Politico” xəbər verir.
NASA-nın direktivində vurğulanır ki, Yerin peykində atom-elektrik stansiyasını tikən ilk ölkə ABŞ-nin imkanlarını əhəmiyyətli dərəcədə məhdudlaşdıracaq “qadağan olunmuş zona” elan edə bilər. Bu ehtimalı nəzərə alan NASA 2030-cu ilə qədər kosmosa göndərilməsi planlaşdırılan 100 kilovatlıq nüvə reaktorunun tikintisi üçün podratçı axtarışlarına başlayır. NASA-nın yüksəksəviyyəli rəsmisinin sözlərinə görə, bu vəziyyətdə "söhbət ikinci kosmik yarışda qalib gəlməkdən gedir".
Nəşr iddia edir ki, ABŞ həmçinin Beynəlxalq Kosmik Stansiyadan imtinanı sürətləndirməyi və 2030-cu ilə qədər onu kommersiya stansiyaları ilə əvəz etməyi planlaşdırır. “Axiom Space”, “Vast” və “Blue Origin” daxil olmaqla artıq bir neçə şirkət NASA-nın tələbini yerinə yetirməyi təklif edib.
Xatırladaq ki, mayda “Roskosmos” Çinlə Ay elektrik stansiyasının yaradılması sahəsində əməkdaşlıq memorandumu imzalayıb. Stansiyada müxtəlif kosmik tədqiqatların aparılması, eləcə də Ayda insanın olması perspektivi nəzərə alınaraq stansiyanın uzunmüddətli pilotsuz işləməsinə imkan verəcək texnologiyaların sınaqdan keçirilməsi planlaşdırılır. Dövlət korporasiyası qeyd edib ki, Ay stansiyasının yaradılması üzrə Rusiya-Çin layihəsinə (2036-cı ilədək nəzərdə tutulub) artıq 13 ölkə qoşulub.
Xatırladaq ki, bir müddət əvvəl Prezident Vladimir Putin Çinlə kosmosda əməkdaşlıq üçün planları açıqlayıb. Bildirib ki, bir çox ölkələr Rusiya Federasiyası ilə kosmik sənaye sahəsində əməkdaşlıqda maraqlıdır və ölkənin artıq Çinlə böyük planları var. Putin Bauman adına Moskva Dövlət Texniki Universitetinin tələbələri ilə görüşündə deyib: “Çinlə böyük planlarımız var. Maraqlı, yaxşı və möhtəşəmdir”. Rusiya lideri həmçinin bildirib ki, amerikalı sahibkar, Tesla və SpaceX şirkətlərinin rəhbəri İlon Mask kimi insanlar tez-tez həyata gəlmir. Putin Maskı sovet akademiki, kosmonavtikasının banisi akademik Sergey Korolyovla müqayisə edib.
Rizvan CƏFƏROV,
“Azərbaycan”
jpg_1765830577.jpg)
jpg_1765830356.jpg)
