Sağlamlıq turizmi son illər dünyada sürətlə inkişaf edən sahəyə çevrilmişdir. Məhz buna görə də Prezident İlham Əliyevin diqqət və qayğısı ilə həyata keçirilən tədbirlər nəticəsində Naftalan öz əvvəlki şöhrətini özünə qaytarmış, uzun sürən durğunluqdan sonra yenidən qapılarını istər yerli, istərsə də xarici turistlərin üzünə açmışdır.
Qeyd edək ki, 19 xəstəliyin dərmanı olan naftalan nefti indiyədək yüz minlərlə xəstəyə şəfa vermişdir. Bütün bunlar nəzərə alınaraq hər il Naftalanda yeni-yeni sağlamlıq ocaqları istifadəyə verilir. Bunun da nəticəsində yerli və xarici turistlərin qəbul edilməsində əvvəllər yaranan çətinliklər aradan qalxır. Hazırda daha bir sağlamlıq ocağında - "Nafta" sanatoriyasında son tamamlama işləri görülür ki, bununla da şəhərdə 20-ci sağlamlıq ocağı turistlərin ixtiyarına veriləcək. 81 otaqdan və 172 çarpayıdan ibarət olan sanatoriyada turistlər üçün ən yüksək şərait yaradılmışdır.
Onu da qeyd edək ki, şəhər rəhbərliyi turistlərin məmnun qalması üçün hər il mövsümqabağı geniş hazırlıq işləri həyata keçirir. Şəhərdə abadlıq və quruculuq işləri aparılmaqla istirahət və əyləncə yerlərində yenidənqurma işləri görülür. Əvvəlki illərdə olduğu kimi, cari ildə də şəhər rəhbərliyi bir neçə yeniliyə imza atmışdır. Belə ki, sağlamlıq və turizm imkanlarını özündə birləşdirən, Beynəlxalq Turizm Mərkəzi olan Naftalanda "Visit Naftalan" mobil tətbiqi yaradılmışdır. Turistlər üç dildə fəaliyyət göstərən "Visit Naftalan" tətbiqinin yaradılmasını yüksək dəyərləndirirlər. İndi şəhərə gələn qonaqlar "Visit Naftalan" mobil tətbiqini "Android" və "İOS" əməliyyat sistemi ilə çalışan mobil telefonlardan yükləyə bilirlər.
Həyata keçirilən bütün bu işlər həm yerli əhalini, həm də kənardan gələn turistləri razı salır. Məhz bunun nəticəsidir ki, əvvəlki illərdə olduğu kimi, cari ilin ötən dövrü ərzində də şəfa tapmaq, eləcə də mənalı istirahət etmək üçün Naftalana gələn turistlərin sayında xeyli artım qeydə alınmışdır. Cari ilin ötən 6 ayı ərzində Naftalana 18681 nəfər turist gəlmişdir ki, bu da ötən ilin müvafiq dövrü ilə müqayisədə 4 min nəfər çoxdur. Gələn turistlərin 6917 nəfəri 37 ölkədən olan xarici vətəndaşlardır. Xarici ölkələrdən gələn turistlər arasında Rusiya Federasiyasından, Qazaxıstan və Özbəkistan respublikalarından olan vətəndaşlar üstünlük təşkil edirlər.
Sabir ƏLİYEV,
"Azərbaycan"
 — копияjpg_1765203606.jpg)
 — копияjpg_1764322678.jpg)
jpg_1763375237.jpg)
