İlin əvvəlindən bu günədək texniki baxışın keçirilməsi ilə əlaqədar 797 kiçikhəcmli gəmi istifadəçisi tərəfindən müraciət daxil olub. Texniki baxışın nəticəsində tələblərə cavab verən 768 kiçikhəcmli gəmi istifadəçisinə üzməyə icazə verən texniki talonlar təqdim edilib. Norma və tələblərə cavab verməyən 29 qayığın istismarına qadağa qoyularaq istismara yararsızlıq barədə akt tərtib olunub.
AZƏRTAC xəbər verir ki, bunu Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidmətinin ictimaiyyətlə əlaqələr və təbliğat şöbəsinin rəisi, daxili xidmət polkovnik leytenantı Aqşin Əlili deyib.
“Gəmi istifadəçilərinə müraciət edirik ki, dövlət qeydiyyatına alınmadan, texniki baxışdan keçmədən, xüsusilə də kiçikhəcmli gəmiləri sürücülük hüququ üçün vəsiqələri olmadan istismar etmək qanunvericiliklə qadağandır. Bu hal inzibati məsuliyyət yaradır. Əgər bu kimi hallar aşkarlanarsa, xidmətin əməkdaşları tərəfindən sözügedən nəqliyyat istifadəçilərinə inzibati protokollar tərtib ediləcək. Həmçinin istər kiçikhəcmli gəmilərin texniki vəziyyətinin qiymətləndirilməsi, istərsə də kiçikhəcmli gəmilərə nəzarət tədbirləri ilboyu davam etdiriləcək", - deyə o bildirib.
Qeyd edək ki, Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidməti tərəfindən illik texniki baxış cədvəlinə uyğun olaraq, kiçikhəcmli gəmilərə texniki baxış keçirilir. Baxışın keçirilməsində əsas məqsəd kiçikhəcmli gəmilərin üzmə şəraitinin qiymətləndirilməsidir. Bu zaman gəmilərin gövdələri, mühərriklərin işləmə prinsipləri, manevr elementləri, sükan qurğusu, xilasetmə, yanğından mühafizə, təchizat avadanlıqları yoxlanılır.
