Qafqaz Müsəlmanları İdarəsinin (QMİ) sədri şeyxülislam Allahşükür Paşazadə G20 Dinlərarası Forum Assosiasiyasının prezidenti Kol Dürhamla videokonfrans formatında görüşüb.
QMİ-nin mətbuat xidmətindən AZƏRTAC-a verilən məlumata görə, videogörüşdə tərəflər qarşılıqlı etimada və ortaq məqsədlərə əsaslanan əməkdaşlığın səviyyəsindən məmnunluq ifadə ediblər.
G20 Dinlərarası forumlarında iştirakını bu platformaya və onun sülhməramlı fəaliyyətinə yüksək ehtiramının sübutu kimi qeyd edən A.Paşazadə vurğulayıb ki, insan həyatına, bəşərin mövcudluğuna təhdid və təhlükələrin artdığı müasir dövrdə siyasi, ictimai və dini liderlərin birgə səylərinin artırılması qlobal dialoq zərurətindən irəli gəlir.
Vurğulanıb ki, son illərin ənənəsi - Böyük İyirmilik ərəfəsi Dinlərarası forumlar dövlət və din nümayəndələrinin birgə əməkdaşlığının səmərəli praktiki təzahürünə çevrilib.
Kol Dürham şeyxülislamla bu yaxınlarda ABŞ-a səfəri çərçivəsində keçirilən görüşü zamanı G20 Dinlərarası Forumunun strukturunda nəzərdə tutulan islahatlarla bağlı A.Paşazadənin böyük təcrübəsinə istinadən ondan öz tövsiyələrini verməsini xahiş etdiyini və proses əsnasında öz aralarında məlumat mübadiləsi aparmaq barədə razılığa gəldiklərini, bu mövzuda cari ayın əvvəlində ilk müzakirələrini xatırladıb.
Şeyxülislam A.Paşazadə bu yaxınlarda iştirak etdiyi Ər-Riyadda keçirilən BMT Sivilizasiyalar Alyansının XI Global Forumu çərçivəsində tədbir iştirakçıları, BMT, habelə Səudiyyə Ərəbistanı Krallığının rəsmiləri ilə ikitərəfli görüşlərində G20 Dinlərarası Forum Assosiasiyası nəzdində müxtəlif dinlərin qlobal Məşvərət Şurasının yaradılması ideyasını müzakirə etdiyini K. Dürhamın diqqətinə çatdırıb və gəldiyi qənaətləri, tanınmış din xadimlərinin bu mövzuya dair fikir və təkliflərini bölüşüb.
Assosiasiyanın prezidenti Kol Dürham şeyxülislam A.Paşazadənin təklif olunan islahatlarla, ələlxüsus, Dinlərarası Forum nəzdində müxtəlif dinlərin tanınmış nümayəndələrini bir araya gətirəcək və daimi fəaliyyət göstərəcək dinlərarası şuranın yaradılması mexanizmi ilə bağlı fikir və tövsiyələrini nəzərə alan layihə ilə QMİ sədrini tanış edib.
Tərəflər Şuranın strukturu, üzvlərinin müəyyən olunması, qərarqəbuletmə mexanizmləri, qarşıdakı məsləhətləşmələr və 2026-cı ildə ABŞ-da keçiriləcək G20 ərəfəsi növbəti Dinlərarası Forum tədbiri ilə bağlı ətraflı müzakirə apardılar.
