Tərəfdaş ölkələr, xüsusilə ABŞ Ukraynada parlament və prezident seçkilərinin keçirilməsini israr edirlər.
Bunu AZƏRTAC-a açıqlamasında ukraynalı ekspert İvan Us söyləyib: “Amerika hakimiyyəti fakt kimi qeyd edir ki, ABŞ İkinci Dünya müharibəsində seçkilər keçirib və heç bir problemlə üzləşməyib. ABŞ müharibə dönəmində seçkilərin keçirilməsi təcrübəsini söyləyir və bunun qorxulu olmadığını deyir. Ukrayna rəsmiləri isə bəyan edir ki, ABŞ 1944-cü ildə prezidentini seçəndə, aktiv hərbi münaqişə yox idi, Ukraynanın ərazisinin isə bir hissəsi işğal olunub. Aktiv müharibə Ukrayna ərazisində davam edir”.
Ukraynanın mövcud qanunvericiliyinə görə, müharibə zamanı seçkilər keçirilə bilər. “Bəs rəsmi Kiyevi bundan çəkindirən səbəblər nədir?” suala cavabında ukraynalı ekspert bildirib: “Ölkə parlamenti hərbi vəziyyət dövründə seçkilərin keçirilməsi barədə qərar qəbul edə bilər. Ancaq gəlin etiraf edək ki, seçki bir günə keçirilmir. Seçkinin keçirilməsi üçün bir müddət vaxt lazım olur. Bu proses 90 gün davam edir. Bu isə o deməkdir ki, dövlət müharibə zamanı 90 gün ərzində vətəndaşının həm də təhlükəsizliyinə qarant durmalıdır. Başa düşmək lazımdır ki, aktiv müharibə zamanı seçkilər keçiriləndə vətəndaşların təhlükəsizliyinə zəmanət vermək olduqca çətindir. Əgər 90 gün seçki prosesində Rusiya raketləri, dronları hər gün hücum edərsə, vətəndaşların təhlükəsizliyinə təminat mümkünsüzdür. Nəzərə alaq ki, seçki prosesində nə qədər kütləvi tədbirlər də keçirilir”.
İvan Us hesab edir ki, sadalanan bu amillərə görə Ukrayna dövləti bu müddətdə seçkiləri keçirməklə vətəndaşların taleyini risk altına atmaq istəmir.
“Müharibə üzündən nə qədər vətəndaşımız ölkə xaricindədir, bundan başqa insanlar səngərdə vuruşur. Onların səsverməsi real görünmür. Əgər bu il sülh olarsa, bunu da hələ nəzəri söyləmək mümkündür, o halda seçki prosesinin başlanması böyük ehtimalla mümkün olacaq”, - deyə ukraynalı ekspert bildirib.
Qeyd edək ki, Volodimir Zelenskinin 5 illik prezidentlik səlahiyyət müddəti ötən ilin may ayının 20-də başa çatıb. Ölkədə parlament seçkiləri isə 2023-cü ilin payızında keçirilməli idi.
