ABŞ Prezidenti Donald Tramp bazar ertəsi miqrantlara qarşı kütləvi kampaniyaya başlayıb. O, bununla əlaqədar Amerika hərbçilərinə sərhədlərin təhlükəsizliyini təmin etmək göstərişi verib. Bundan başqa, miqrantların sığınacaqlara yerləşdirilməsi ilə bağlı geniş qadağa və ABŞ ərazisində dünyaya gəlmiş uşaqların vətəndaşlıq almalarına məhdudiyyətlər tətbiq edilib.
AZƏRTAC xəbər verir ki, ölkədə qeyri-qanuni miqrasiyanı fövqəladə vəziyyət kimi elan edən Tramp sərhəddə divar çəkilməsi, miqrantlar üçün müvəqqəti saxlanma yerlərinin yaradılması və onların geri göndərilməsinə Pentaqonun dəstək göstərməsi tapşırığını verib. Prezident, həmçinin ehtiyac duyulduğu təqdirdə sərhədə ordu göndərilməsinə dair müdafiə nazirinə səlahiyyət verib.
“Reuters” agentliyi yazır ki, Donald Tramp sərhədlərin təhlükəsizliyini gücləndirməyə və rekord sayda miqrantın deportasiya ediləcəyinə söz verib. O, administrasiyasını “Meksikada qal” proqramını bərpa etməyə çağırıb. Bu proqram çərçivəsində meksikalı olmayan miqrantlar ABŞ-la əlaqəli işlərinə dair qərarı gözləmək üçün Meksikada qalmağa məcbur idilər.
“Ali baş komandan olaraq, ölkəmizi təhlükə və işğaldan qorumaqdan daha üstün məsuliyyətim yoxdur və məhz bunu da etməyə hazırlaşıram”, – deyə Tramp inauqurasiya zamanı etdiyi çıxışında qeyd edib.
İnauqurasiyadan sonra ABŞ sərhəd orqanları keçmiş Prezident Co Baydenin “CBP One” proqramını bağladıqlarını elan ediblər. Bu proqrama məxsus tətbiq vasitəsilə yüz minlərlə miqrant qəbula yazılaraq ABŞ-a leqal yolla daxil ola bilirdi.
Respublikaçılar qeyd edirlər ki, Baydenin prezidentliyi dövründə milyonlarla mühacir qeyri-qanuni yolla sərhədi keçərək ABŞ ərazisinə daxil olandan sonra kütləvi deportasiya halları labüd oldu. ABŞ hökumətinin hesablamalarına görə, 2022-ci ilin əvvəlində ABŞ-da 11 milyon qeyri-leqal və ya müvəqqəti qalma statusu olan miqrant olub, bəzi analitiklər isə bu rəqəmin 13-14 milyon olduğunu iddia edirlər.
Tramp özünün “doğum hüququ əsasında vətəndaşlıq” sərəncamında Amerika agentliklərini ABŞ-da dünyaya gəlmiş uşaqların valideynlərindən ən azı birinin ABŞ vətəndaşlığı olmadığı və ya burada daimi yaşamadığı təqdirdə onları vətəndaşlığını təsdiq etməməyə çağırıb.
O, digər fərmanı ilə qaçqınların ABŞ-a köçməsini azı 3 ay müddətinə dayandırıb və müəyyən ölkələrdən olan səyahətçilərə səfər qadağasının tətbiq edilməsinin lazım olub-olmadığına dair təhlükəsizlik yoxlamalarının aparılmasını tapşırıb.
Tramp, həmçinin cinayətkar kartlellərin xarici terror təşkilatı kimi tanınması və xarici dəstələrə qarşı 1798-ci ilin “Xarici düşmənlər haqqında Qanun”un tətbiq edilməsi təşəbbüsünü irəli sürüb.
