Türkiyə və Azərbaycan məhz Cənubi Qafqaz regionuna uzunmüddətli sülh gətirən dövlətlərdir. Regiondankənar ölkələrin iki qardaş ölkənin sülh səylərinə mane olmaması, onların görəcəyi ən yaxşı işdir.
Bu barədə AZƏRTAC-ın müxbirinə müsahibəsində Ankaradakı OSTİM Texniki Universitetində keçirilən “Müstəmləkəçilik cinayətləri” mövzusunda konfransda moderator qismində iştirak edən Türkiyənin Rusiyadakı sabiq səfiri Ümit Yardım bildirib.
Türkiyəli diplomat 44 günlük Vətən müharibəsinin siyasi və hərbi nəticələri ilə bağlı müasir Azərbaycanın nailiyyətlərini “parlaq” adlandırıb. “Azərbaycanın Qələbəsi, şübhəsiz ki, regionda sülh və sabitliyə gedən yolda ciddi irəliləyişlərə gətirib çıxardı. Lakin təəssüflər olsun ki, müəyyən regiondankənar güclərin Cənubi Qafqazla bağlı başqa planları var”, -deyə sabiq səfir bildirib.
Onun sözlərinə görə, Ankara Cənubi Qafqazda sülhün möhkəmləndirilməsinin vacibliyini başqalarından daha yaxşı dərk edir.
Diplomat qeyd edib: “Əlbəttə, Ermənistanla sülh sazişinin imzalanması bütün region üçün mühüm addımdır, lakin Türkiyə və Azərbaycan bu addımdan sonra sayıqlığı itirməməlidir”.
Ümit Yardım bir vaxtlar Osmanlı imperiyasına qarşı “erməni kartı”ndan istifadə edən ölkələrin dəstəklədiyi qondarma “soyqırımı” lobbisinin hiylələrinə də diqqət çəkib.
Sabiq səfir Cənubi Qafqazla heç bir əlaqəsi olmayan bir ölkənin lideri Emmanuel Makronun 1915-ci il hadisələri ilə bağlı Ermənistanın baş naziri Nikol Paşinyandan daha radikal bəyanatlar səsləndirməsini tragikomik hal adlandırıb.
Türkiyəli diplomat rəsmi İrəvanın özünün də mövqeyinə diqqət çəkərək bildirib: “Ermənistanın mövqeyində heç bir köklü dəyişiklik görmürəm”. O, eyni zamanda, Türkiyə və Azərbaycanın liderlik etdiyi yeni münasibətlər sisteminin formalaşması ilə Fransa kimi güclərin Cənubi Qafqazda təsirinin yox olacağına əminliyini ifadə edib.
Qeyd edək ki, Ankara Universitetində keçirilən konfransın iştirakçıları Cənubi və Şimali Amerika, Afrika xalqlarının, eləcə də Balkan regionu, Pakistan, Hindistan, Myanma əhalisinin müstəmləkəçilikdən sonrakı dövrdə üzləşdiyi problemlərə diqqət yetiriblər.
