Regiondankənar aktorların Cənubi Qafqazda proseslərə və dövlətlərarası dialoqa müdaxiləsinin qarşısının alınması bütün region ölkələrinin, o cümlədən Ermənistanın maraqlarına uyğundur.
AZƏRTAC xəbər verir ki, bu fikri Ankara Avrasiya Araşdırmaları Mərkəzinin (AVİM) eksperti Selenay Erva Yalçın ifadə edib.
Onun sözlərinə görə, Bakı ilə İrəvan arasında vasitəçilərsiz ikitərəfli dialoqun real irəliləyişə, daha doğrusu, sülh sazişinin bəndləri üzrə razılaşmaya gətirib çıxarması göstərir ki, Ermənistan təxribat xarakterli bəyanatlara, o cümlədən regiondankənar aktorlardan irəli gələn ritorikaya məhəl qoymamaq şərti ilə qonşu dövlətlərlə dialoqu inkişaf etdirməyə qadirdir.
Ekspert qeyd edib ki, indiki mərhələdə regionun İrəvan tərəfindən sülh, sabitlik və inkişaf istiqamətində atılacaq konkret addımlara ehtiyacı var.
AVİM analitikinin fikrincə, Azərbaycanın Ermənistan Konstitusiyasının hazırkı redaksiyasına dəyişiklik edilməsi, o cümlədən Naxçıvanla respublikanın qərb rayonları arasında kommunikasiyanın açılması ilə bağlı tələbləri tam haqlıdır və beynəlxalq hüququn tələblərini əks etdirir.
S. E. Yalçın diqqətə çatdırıb ki, bəzi Qərb dairələri və erməni diasporu Ermənistanla qonşu dövlətlər arasında münasibətlərin normallaşmasının əleyhinədir. “Bu, Türkiyədə ermənilər arasında düşmənçiliyin qızışdırılmasına yönəlmiş aktiv anti-Türkiyə təbliğatı ilə bağlıdır. Eyni zamanda, Ermənistan hakimiyyəti də regionda etimad mühiti yaratmağa yönəlmiş addımlar atmaqdan uzaqdır”, -deyən AVİM eksperti qeyd edib ki, İrəvandan fərqli olaraq, Ankaranın regionda dialoqun təşviqi ilə bağlı mövqeyi səmimidir.
Analitik daha sonra qeyd edib ki, regionda münasibətlərin normallaşması və mehriban qonşuluq əlaqələrinin qurulması ilə erməni diasporu dünyada siyasi və maliyyə dəstəyini itirəcək və deməli, radikal təşkilatların mənafelərinə uyğun olacaq məkrli oyunlara böyük ölçüdə son qoyulacaq.
Ekspert Qərb mətbuatında Türkiyə ilə Azərbaycan arasındakı müttəfiqliyi ləkələməyə çalışan qərəzli materiallara da diqqət çəkib.
AVİM analitiki region ölkələri arasında açıq və birbaşa dialoqu Cənubi Qafqazda sülhün və rifahın açarı adlandırıb.
