Müasir texnologiyaların və innovativ yanaşmaların tətbiqi humanitar minatəmizləmə proseslərinin daha təhlükəsiz və səmərəli həyata keçirilməsinə imkan verir. Bununla yanaşı, innovasiyaların tətbiqi üçün davamlı maliyyələşmə, əməkdaşlıq və real ehtiyaclara əsaslanan yanaşma vacibdir.
AZƏRTAC xəbər verir ki, bunu Cenevrə Humanitar Minatəmizləmə Beynəlxalq Mərkəzinin (GICHD) proqram meneceri Stanislav Damyanoviç IV Beynəlxalq Minatəmizləmə Konfransı çərçivəsində keçirilən “Daha təhlükəsiz və səmərəli humanitar minatəmizləmə üçün texnologiya və innovasiya” mövzusunda panel sessiyada çıxışı zamanı deyib.
O bildirib ki, innovasiya mina fəaliyyəti sahəsində məqsəd deyil, daha yaxşı nəticələr əldə etmək üçün vasitədir. İnnovasiya yalnız yeni texnologiyalarla məhdudlaşmır, həmçinin müasir metodologiyaları, daha düzgün qərar qəbuletməni, prioritetlərin müəyyənləşdirilməsini, məlumatlardan səmərəli istifadəni və resursların idarə olunmasına yeni yanaşmaları əhatə edir.
Stanislav Damyanoviç innovasiyanın qarşısındakı əsas maneələrdən birinin maliyyə çatışmazlığı olduğunu qeyd edib. Bildirib ki, innovativ həllərin hazırlanması və daha geniş miqyasda tətbiqi üçün davamlı maliyyələşməyə ehtiyac var. İnnovasiya Mərkəzinin 2027–2030-cu illər üzrə strateji prioritetlərindən biri də bu məsələnin sistemli şəkildə həllinə yönəlib.
O, həmçinin bütün problemləri həll edəcək universal texnologiya axtarışının düzgün yanaşma olmadığını vurğulayıb. Onun sözlərinə görə, mina fəaliyyəti sahəsində ehtiyaclar ərazinin xüsusiyyətlərindən və yerli şəraitdən asılı olaraq dəyişir. Buna görə innovativ həllər konkret ehtiyaclar əsasında hazırlanmalıdır.
GICHD proqram meneceri əməkdaşlıq və koordinasiyanın gücləndirilməsinin də vacib olduğunu deyib. Qeyd edib ki, İnnovasiya Mərkəzi müxtəlif maraqlı tərəfləri bir araya gətirərək bu istiqamətdə platforma yaradır. Hazırda Mərkəzdə 100-dən çox təşkilat təmsil olunur.
Stanislav Damyanoviç yeni texnologiyaların tətbiqi ilə yanaşı, onların istifadəsini tənzimləyən siyasət və standartların hazırlanmasının vacibliyini də diqqətə çatdırıb. O, dəyişikliyə müqavimətin innovasiyanın qarşısındakı digər maneə olduğunu bildirib və maliyyə imkanlarının məhdudlaşdığı bir şəraitdə səmərəliliyin artırılmasının xüsusi əhəmiyyət daşıdığını vurğulayıb.
