Fransanın yeni hökuməti oktyabrın 13-də fəaliyyətə başlayıb. Baş nazir Sebastyan Lökornü “Matignon”da nazirlərlə keçirdiyi ilk iclasda əsas məqsədlərinin siyasi böhranı aradan qaldırmaq olduğunu vurğulayıb.
AZƏRTAC xəbər verir ki, Baş nazir yeni nazirlərə müraciətində onların bu çətin dönəmdə hökumətin tərkibinə daxil olma qərarına görə təşəkkür edib.
Yeni hökumət həm siyasətçilərdən, həm də mülki cəmiyyətdən olan peşəkarlardan ibarətdir. Yeni kabinetə 8 mülki şəxs də daxil edilib. Ümumilikdə 26 siyasi fiqur təmsil olunur.
Ancaq sağ partiyadan olan altı nazir dərhal “Les Republicains” partiyasından çıxarılıb. Partiya lideri Bruno Retailleau onlara hökumətə qatılmamağı tapşırmışdı.
Baş nazirin ofisi yeni nazirlərdən təyinat mərasimlərinin sadə, qapalı qapılar arxasında və mətbuatsız keçirilməsini istəyib. “Matignon”un tələbinə əsasən, bu tədbirlər ictimaiyyətin və qonaqların iştirakı olmadan keçiriləcək.
Yeni hökumət qurular-qurulmaz, bütün müxalifət partiyaları artıq Baş nazirə qarşı etimadsızlıq təklifləri ilə çıxış edirlər. Baş nazirin taleyi, əsasən Sosialist Partiyası ilə aparılan danışıqlardan asılıdır – xüsusilə pensiya islahatları mövzusunda.
Milli Assambleyada solçu qrupun rəhbəri Mathilde Panot X sosial platformasında yazıb: “Qutularınızı hələ açmayın, etimadsızlıq gəlir”.
RN partiyasının lideri Marin Lö Pen isə etimadsızlıq təklifini rəsmən təqdim edəcəyini açıqlayıb.
Prezident Emmanuel Makronun Misirdən qayıdışından sonra hökumətin Nazirlər Şurasının ilk iclası keçiriləcək. Hökumət həmin gün 2026-cı il üçün büdcə layihəsini təqdim etməyə çalışacaq ki, bu sənəd eyni gündə parlamentə göndərilə bilsin.
