Qərb bölgəsində 20 Yanvar faciəsinin 36-cı ildönümü ilə əlaqədar anım tədbirləri keçirilib.
AZƏRTAC-ın bölgə müxbirinin verdiyi məlumata görə, Samuxda rayon icra hakimiyyətinin, idarə, müəssisə və təşkilatların, hüquq-mühafizə orqanlarının rəhbərləri, şəhid ailələri, ictimaiyyət nümayəndələri, yerli sakinlər Samux Şəhidlər Kompleksini ziyarət ediblər. Mərasim iştirakçıları Azərbaycanın müstəqilliyi, suverenliyi və ərazi bütövlüyü uğrunda canlarından keçən şəhidlərin əziz xatirəsini dərin ehtiramla yad edərək, kompleksin önünə tər qərənfillər qoyublar. 20 Yanvar faciəsinin yaddaşımıza həm kədər, həm də qürur günü kimi həkk olunmasından, şəhidlərimizin qanı ilə yazılan bu tarixin xalqımızın azadlıq mübarizəsinin rəmzinə çevrildiyindən bəhs edilib.
Daşkəsəndə də 20 Yanvar - Ümumxalq Hüzn Günü ehtiramla qeyd olunub. Daşkəsən Şəhidlər xiyabanında təşkil olunan anım mərasimində rayon icra hakimiyyətinin, hüquq-mühafizə orqanlarının rəhbərləri, hərbçilər, idarə, müəssisə və təşkilatların kollektivləri, şəhid ailələrinin üzvləri, müharibə iştirakçıları, ictimaiyyət nümayəndələri və sakinlər iştirak ediblər. Şəhidlər xiyabanındakı “Əbədi məşəl” abidəsinin önünə əklil qoyulub, 20 Yanvar faciəsi qurbanları və şəhidlərimiz ehtiramla anılıb, Birinci və İkinci Qarabağ müharibələri zamanı torpaqlarımızın azadlığı uğrunda şəhid olmuş igid daşkəsənlilərin məzarları üzərinə tər qərənfillər düzülüb. Xalqımızın 20 Yanvar faciəsi şəhidlərinin əziz xatirəsinin hər zaman əziz olduğu vurğulanıb.
Şəmkirdə rayon icra hakimiyyətinin, hüquq-mühafizə orqanlarının, idarə, müəssisə və təşkilatların rəhbərləri, şəhid ailələrinin üzvləri, qazilər, rayon ictimaiyyətinin nümayəndələri 20 Yanvar qurbanlarının xatirəsinə ucaldılmış abidəni, həmçinin Şəhidlər xiyabanını ziyarət ediblər. Şəhidlərimizin əziz xatirəsi hörmət və ehtiramla yad edilib.
20 Yanvar faciəsinin 36-cı ildönümü ilə bağlı saat 12:00-da hər üç rayonda şəhidlərimizin əziz xatirəsi bir dəqiqəlik sükutla yad edilərək, nəqliyyatın hərəkəti dayandırılıb, avtomobillər vasitəsilə səs siqnalları verilib.
jpg_1770988918.jpg)
