Prezident İlham Əliyev ilk dəfə dövlət başçısı seçilərkən səsləndirdiyi "Mən hər bir azərbaycanlının Prezidenti olacağam" bəyanatına bütün fəaliyyəti boyunca sadiq qalıb. Onun Ulu Öndər Heydər Əliyevin siyasi kursunu uğurla davam etdirməsi Azərbaycanın müstəqilliyinin daha da möhkəmlənməsinə, dövlətçiliyinin güclənməsinə və ölkənin davamlı inkişafına mühüm töhfə verib. Bu gün Azərbaycan tam müstəqil siyasət yürüdən, vətəndaşının özünü təhlükəsiz hiss etdiyi və dövlətin daim onun yanında olduğunu gördüyü bir ölkədir. Daxildə yeni münasibətlər sisteminin formalaşdırılması istiqamətində ardıcıl addımlar atılıb, xarici siyasətdə isə milli maraqlar əsas prinsip kimi götürülüb. Nəticədə Azərbaycan beynəlxalq aləmdə yüksək nüfuz qazanıb.
Bu fikirləri AZƏRTAC-a açıqlamasında Milli Məclisin deputatı Aydın Mirzəzadə deyib.
O bildirib ki, Prezident İlham Əliyev şəxsi keyfiyyətləri ilə seçilən liderdir. Onun milli maraqlara, tarixi təcrübəyə və müasir çağırışlara əsaslanan siyasi yanaşması daim uğurlu olub. Bu baxımdan, demək olar ki, dövlətimizin başçısının xalqa söykənməsi, xalqdan güc alması qarşıya qoyulan böyük dövlətçilik məsələlərinin həllində həmişə müsbət nəticələrə gətirib çıxarır.
“Prezident İlham Əliyev dünya siyasətində tanınan nüfuzlu dövlət xadimidir. Onun həm qonşu ölkələrlə, həm Azərbaycanla əməkdaşlıq etmək istəyən dövlətlərlə münasibətlərdə, həm də beynəlxalq təşkilatlardakı səmərəli fəaliyyəti ölkəmizin beynəlxalq mövqelərini daha da möhkəmləndirib. Təsadüfi deyil ki, müxtəlif ölkələrin liderləri və nüfuzlu siyasi analitiklər Prezident İlham Əliyev haqqında yüksək fikirlər səsləndirir, onu öz xalqının maraqlarını qətiyyətlə müdafiə edən güclü siyasi lider kimi dəyərləndirirlər. Dövlətimizin başçısı siyasətində müstəqilliyimizin qorunmasına və möhkəmləndirilməsinə, ölkədaxili məsələlərin həllinə xüsusi önəm verir”, - deyə deputat əlavə edib.
A.Mirzəzadə diqqətə çatdırıb ki, Azərbaycan dövləti uzun illər torpaqların işğaldan azad edilməsini əsas milli prioritet kimi müəyyənləşdirmişdi. Bu məqsədə nail olmaq üçün güclü iqtisadiyyatın, güclü Ordunun, səmərəli xarici siyasətin və milli birliyin təmin edilməsi zəruri idi.
"Prezident İlham Əliyev bu strateji vəzifələrin hamısını uğurla yerinə yetirdi. Torpaqlarımızın işğaldan azad olunması Azərbaycana bütün resurslarını ölkənin gələcək inkişafına və digər mühüm məsələlərin həllinə yönəltmək imkanı yaradıb. Bu gün Azərbaycan Cənubi Qafqazın lider dövlətidir. Qonşu ölkələrlə hərtərəfli əməkdaşlığın inkişafı xarici siyasətimizin əsas istiqamətlərindən biridir. Azərbaycan bütün problemlərin beynəlxalq hüquq normaları, dövlətlərin suverenliyinə, ərazi bütövlüyünə və müstəqilliyinə hörmət prinsipləri əsasında həllinin tərəfdarıdır. Məhz bu prinsiplər ölkəmizin ikitərəfli münasibətlərinin də əsasını təşkil edir. Azərbaycan bundan sonra da regionda sülhün, sabitliyin və qarşılıqlı maraqların qorunmasına yönəlmiş mövqeyini qətiyyətlə davam etdirəcək", - deyə Aydın Mirzəzadə qeyd edib.
