Masallıda Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin Lənkəran-Astara Regional Məşğulluq filialı tərəfindən növbəti əmək yarmarkası keçirilib.
Əmək yarmarkasında müxtəlif fəaliyyət sahələrini təmsil edən 15 işəgötürən iştirak edib və ümumilikdə 104 vakant iş yeri təqdim olunub. Təklif edilən vakansiyalar xidmət, ticarət, istehsalat, tikinti və digər sahələri əhatə edib.
Yarmarkaya 200-ə yaxın işsiz və işaxtaran vətəndaş qatılıb. İştirakçılar arasında Vətən müharibəsi iştirakçıları, qazilər, sosial müdafiəyə xüsusi ehtiyacı olan şəxslər, eləcə də ali və orta ixtisas təhsilli gənc məzunlar olub. Bu kateqoriyalardan olan şəxslərin məşğulluğunun təmin edilməsi tədbirin əsas prioritet istiqamətlərindən biri olub.
Tədbir çərçivəsində işəgötürənlər tərəfindən vakansiyalar barədə ətraflı məlumat verilib, işaxtaranlarla ilkin müsahibələr aparılıb. Müraciət edən şəxslərin CV-ləri qəbul edilərək qeydiyyata alınıb, ixtisas və bacarıqlarına uyğun gələn namizədlər növbəti seçim mərhələsinə dəvət olunublar. Bununla yanaşı, iştirakçılara məşğulluq imkanları, aktiv məşğulluq tədbirləri, peşə hazırlığı kursları və özünüməşğulluq proqramları barədə də məlumatlar təqdim edilib, onlara karyera istiqamətinin müəyyənləşdirilməsi ilə bağlı tövsiyələr verilib.
Bu cür əmək yarmarkalarının keçirilməsi regionda əmək bazarının inkişafına, işsizliyin azaldılmasına və işəgötürənlərlə işaxtaranlar arasında birbaşa əlaqələrin qurulmasına kömək edir.
Seyran CAVADOV,
"Azərbaycan"
