Lənkəran şəhər 3 və 7 saylı körpələr evi-uşaq bağçaları əsaslı təmirdən sonra istifadəyə verilib. Bununla bağlı tədbir keçirilib.
Çıxış edən şəhər icra hakimiyyətinin başçısı Taleh Qaraşov bildirib ki, bağçaların Ümummilli Lider Heydər Əliyevin anadan olmasının 102 illiyi ərəfəsində istifadəyə verilməsi rəmzi məna daşıyır. Ulu Öndərin "Uşaqlar bizim gələcəyimizdir, gələcəyimizi nə cür tərbiyə edəcəyiksə, ölkəmizin, millətimizin, dövlətimizin sabahı bundan asılı olacaqdır" fikirlərini xatırladan ŞİH-in başçısı qeyd edib ki, müstəqil Azərbaycanda uşaqlara diqqət və qayğının dövlət siyasətinin prioritet istiqaməti kimi formalaşması Ümummilli Liderin adı ilə bağlıdır. "Dövlət uşaq siyasətinin başlıca prinsipləri uşaqların keyfiyyətli təhsil və müasir tələblərə cavab verən tibbi xidmətlərlə təmin edilməsi, hərtərəfli qayğıkeşliklə əhatə olunması, yüksək mənəvi dəyərlərə əsaslanan sosial mühitdə böyüməsi üçün zəruri şərait yaradılması, uşaqların şəxsiyyət və layiqli vətəndaş kimi formalaşmasıdır. Ölkəmizdə uşaqların maraq və mənafelərinin qorunmasına, onlara diqqət və qayğının göstərilməsinə hər zaman həssas yanaşılıb və Ulu Öndərin başlatdığı bu siyasət Prezident İlham Əliyev və Birinci vitse-prezident Mehriban xanım Əliyeva tərəfindən uğurla davam etdirilir", - deyə T.Qaraşov bildirib.
Lənkəran-Astara Regional Təhsil İdarəsinin müdiri B. Mehdiyev ölkəmizdə təhsil sahəsində görülən işlər barədə məlumat verib, dövlətin bu sahəyə ayırdığı xüsusi diqqətdən danışıb, körpələr evi-uşaq bağçalarında aparılan əsaslı təmir işlərinin də məhz bunun təzahürü olduğunu vurğulayıb.
Lənkəran şəhər 3 saylı uşaq körpələr evi-uşaq bağçası 90, 7 saylı körpələr evi-uşaq bağçası 225 yerlikdir. Bağçalarda təhlükəsizlik məqsədilə müşahidə kameraları quraşdırılıb. Azyaşlı sakinlərin zövqünə uyğun dizayn edilən bağçalar körpələrin rahatlığını, istirahətini və ilkin biliklərə yiyələnməsini təmin etmək üçün əlvan rəngli inventarla təchiz olunub, müxtəlif yaş qrupları üçün məşğələ və yataq otaqları, rəsm, idman və musiqi zalları, yeməkxana əsaslı təmir edilib, balacaların təlim-tərbiyəsi ilə məşğul olmaq, həmçinin onlarda bacarıq və istedadları aşkarlamaq üçün hərtərəfli şərait yaradılıb.
"Azərbaycan"
jpg_1768206707.jpg)
