İqtisadiyyat nazirinin birinci müavini Elnur Əliyevin rəhbərlik etdiyi Azərbaycan nümayəndə heyəti İspaniyaya səfər edib. Səfər çərçivəsində İspaniya-Azərbaycan Dəyirmi Masası, İkinci İspaniya-Azərbaycan Strateji İqtisadi Dialoqu və İspaniya rəsmiləri ilə görüşlər keçirilib.
Nazirlikdən AZƏRTAC-a bildirilib ki, Madriddə təşkil olunan İspaniya-Azərbaycan Dəyirmi Masasında hər iki ölkədən dövlət qurumları və şirkətlərin nümayəndələri iştirak ediblər.
Elnur Əliyev Azərbaycanın İspaniya ilə münasibətlərə önəm verdiyini vurğulayıb. Qeyd olunub ki, İspaniya ilə ticarət, investisiya, enerji, nəqliyyat-logistika, kənd təsərrüfatı, texnologiya, innovasiya və digər sahələr üzrə birgə fəaliyyətin genişləndirilməsi üçün böyük potensial mövcuddur. Ölkələrimizin bu potensialı real nəticələrə çevirməsi mühüm əhəmiyyət daşıyır. Azərbaycanın işgüzar mühiti haqqında da məlumat verilib. Bildirilib ki, ölkədə ticarət, istehsal və logistikanı dəstəkləyən investisiya platformaları fəaliyyət göstərir. Bu kontekstdə Bakı Beynəlxalq Dəniz Ticarət Limanı yaxınlığında yerləşən Ələt Azad İqtisadi Zonası, sənaye zonaları, həmçinin Qarabağ və Şərqi Zəngəzur iqtisadi rayonlarında sərmayədarlar üçün yaradılan imkanlar diqqətə çatdırılıb.
İspaniyanın ticarət üzrə dövlət katibi Amparo Lopes Senovilya ikitərəfli iqtisadi münasibətlərin inkişafını yüksək qiymətləndirib, qarşılıqlı investisiya və biznes əlaqələrinin genişləndirilməsi barədə fikirlərini bölüşüb.
Dəyirmi Masada İspaniya Ticarət Palatasının baş direktoru İnmakulada Riera, İspaniya Sahibkar Təşkilatları Konfederasiyasının Beynəlxalq Əlaqələr Komissiyasının sədri Marta Blanko, Azərbaycanın İspaniyadakı səfiri Ramiz Həsənov Azərbaycan-İspaniya iqtisadi əlaqələrinin genişləndirilməsi imkanlarını qeyd ediblər.
Tədbirdə Azərbaycanın investisiya mühiti və biznes imkanları barədə təqdimat keçirilib, tərəfdaşlığın möhkəmləndirilməsinə dair müzakirələr aparılıb.
İkinci İspaniya-Azərbaycan Strateji İqtisadi Dialoqunda vurğulanıb ki, İqtisadi Dialoq mexanizmi vasitəsilə ticarət dövriyyəsinin artırılması, investisiya axınının genişləndirilməsi və prioritet sahələr üzrə əməkdaşlığın gücləndirilməsi üçün əlverişli imkanlar var. Bununla yanaşı, tərəfdaşlığın gələcəkdə daha geniş institusional formatda inkişaf etdirilməsinin əhəmiyyəti diqqətə çatdırılıb. Tədbirdə Azərbaycan Respublikası və İspaniya Krallığı arasında Strateji İqtisadi Dialoqun 2-ci iclasının Protokolu imzalanıb, həmçinin Protokolun əlavəsi olaraq ticarət, investisiya, nəqliyyat-tranzit və digər istiqamətlər üzrə tərəfdaşlığı nəzərdə tutan Yol Xəritəsi qəbul edilib.
İqtisadiyyat nazirinin birinci müavini Elnur Əliyevin İspaniya Krallığının ticarət üzrə dövlət katibi Amparo Lopes Senovilya ilə görüşündə qarşılıqlı ticarət dövriyyəsinin artırılması, investisiya əməkdaşlığının genişləndirilməsi, biznes dairələri arasında əlaqələrin gücləndirilməsi və digər məsələlər haqqında müzakirələr aparılıb.
İspaniya Krallığının Deputatlar Palatasının İqtisadiyyat, Ticarət və Rəqəmsal Transformasiya Komitəsinin sədri Pedro Puy Fraqa ilə müzakirələrdə parlamentlərarası əlaqələrin iqtisadi əməkdaşlığa töhfəsi qeyd olunub. Eyni zamanda, Azərbaycanın regionun strateji logistika və enerji qovşağı kimi rolu, Orta Dəhliz çərçivəsində imkanları, nəqliyyat bağlantıları və İspaniya şirkətləri üçün investisiya perspektivləri haqqında məlumat verilib.
İspaniyanın Rəqəmsal Transformasiya, Nəqliyyat və Dayanıqlı Mobillik, Kənd Təsərrüfatı, Balıqçılıq və Ərzaq nazirliklərinin nümayəndələri ilə görüş keçirilib. Görüşdə rəqəmsal iqtisadiyyatın inkişafı, dövlət idarəçiliyində məlumat əsaslı həllər, innovasiya ekosisteminin gücləndirilməsi, nəqliyyat-logistika və ərzaq təhlükəsizliyi üzrə təcrübə mübadiləsinin əhəmiyyəti vurğulanıb.
Beynəlxalq Zeytun Şurasının icraçı direktoru Jaime Lilyo Lopes ilə görüşdə Azərbaycanın qurum çərçivəsində fəaliyyəti, zeytunçuluq sahəsində beynəlxalq standartların tətbiqi, texniki əməkdaşlıq, sertifikatlaşdırma, ekspert dəstəyi və yerli istehsalçıların beynəlxalq bazarlara çıxış imkanları nəzərdən keçirilib.
