Fransada yenidən Azərbaycan himni səsləndi

Fransada idman həvəskarlarının həyəcanı artmaqdadır. Parisdə sayca XVII Paralimpiya Oyunları davam edir. Planetin ən güclü idmançılarının yarışdığı turnirdə gərgin idman mübarizəsinin şahidi oluruq. 
Azərbaycanda da hamı Parisdən medal xəbəri eşitmək  ümidi ilə yarışları izləyir. Bundan əvvəl  iştirak etdikləri son 7 paralimpiadada qazandıqları medallarla xalqımızı sevindirən paralimpiya yığmamızda parataekvondoçuların çıxışları hamının diqqətini çəkdi. Belə ki, ilk yarış günündə bu idman növündə Sabir Zeynalov (58 kq) bürünc medal qazandı. 
Sevindirici haldır ki, ikinci yarış günündə qazanılan medalın əyarı qızıl oldu. Belə ki, 70 kq çəkidə yarışan parataekvondoçumuz İmaməddin Xəlilov "Paris-2024"də ölkəmizin hesabına ilk qızıl medalı yazdıran idmançı kimi tarixə düşdü.
Təmsilçimiz mübarizəyə 1/4 finaldan başlayıb. Miçel Ernesto Uolkerlə (Kuba) üz-üzə gələn idmançımız 12:2 hesabı ilə qələbə qazanıb. İ.Xəlilov yarımfinalda özbəkistanlı Cavoxir Alikulovla qarşılaşıb. İmaməddin rəqibinə 7:2 hesabı ilə qalib gələrək finala yüksəlib. Həlledici mərhələdə rəqib türkiyəli Fatih Çelik olub. Rəqibinə 15:2 hesabı ilə qalib gələn İmaməddin Xəlilov Paralimpiya çempionu olub.
Bununla da, Fransada növbəti dəfə himnimiz səsləndi, bayrağımız yüksəkdə dalğalandı. Xatırladaq ki, bir ay bundan öncə Parisdə keçirilən Yay Olimpiya Oyunlarında da himnimiz iki dəfə səslənmişdi.

Elçin CƏFƏROV,
"Azərbaycan"