Avropa İttifaqı Azərbaycanın regional və geosiyasi əhəmiyyətini qəbul edir
"Azərbaycan regionda əhəmiyyətli tərəfdaşdır və əlaqələrimizin gücləndirilməsi baxımından müəyyən gözləntilərimiz var. Əlaqələrimiz ikitərəfli yol kimi inkişaf edir. Avropa İttifaqı Azərbaycanın ən böyük ticarət tərəfdaşıdır. Münaqişənin izlərinin aradan qaldırılması və həyatların xilas edilməsi üçün görülən işləri yüksək qiymətləndiririk".
Bu fikirləri Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas xarici işlər naziri Ceyhun Bayramovla dünən keçirdiyi birgə mətbuat konfransında söylədi.
Avropa İttifaqının Azərbaycanın ən böyük ticarət tərəfdaşı olduğunu deyən diplomat bəyan etdi ki, Aİ Azərbaycanla ticarət əlaqələrini yeni razılaşma əsasında daha da genişləndirməyi planlaşdırır.
Prezident İlham Əliyevlə keçirilən görüşdə də Kaya Kallas Avropa İttifaqının Azərbaycanla əlaqələri yüksək dəyərləndirdiyini və bu münasibətləri daha da inkişaf etdirməkdə maraqlı olduğunu qeyd etdi.
9 illik fasilədən sonra Avropa İttifaqının ali nümayəndəsinin Azərbaycana səfərinə və Kaya Kallasın səsləndirdiyi fikirlərə əsaslanaraq deyə bilərik ki, Aİ Azərbaycanın regional və geosiyasi əhəmiyyətini qəbul edir, Azərbaycanın Xəzər dənizi - Qara dəniz regionunda oynadığu rolu, Avropanın enerji təhlükısizliyinin təmin edilməsində yerini yüksək qiymətləndirir. Çünki bu gün Azərbaycan Avropanın 10 ölkəsinə qaz verir və Avropada təchizatın coğrafiyasına görə birinci yerdədir.
Avropa İttifaqının Xarici siyasət və təhlükəsizlik məsələləri üzrə ali nümayəndəsinin səsləndirdiyi fikirlərdən o da bəlli olur ki, Aİ Azərbaycanın əhəmiyyətini artıq görür və əvvəl mövcud olmuş stereotiplər və yanaşmalardan geri çəkilir. Səfərin nəticələri onu deməyə əsas verir ki, ikitərəfli əlaqələr yeni müstəviyə yüksəlir.
Kaya Kallas Azərbaycana səfəri çərçivəsində Prezident İlham Əliyevlə keçirdiyi görüşdə, həmçinin Ceyhun Bayramovla birgə keçirdiyi mətbuat konfransında Avropa İttifaqının Ermənistanla Azərbaycan arasında aparılan sülh danışıqları, eləcə də minatəmizləmə prosesində iştirakı barədə fikirlərini bölüşüb.
Qeyd edilib ki, Avropa İttifaqı Azərbaycanda minaların təmizlənməsi prosesinə töhfə verməkdədir və ölkədə münaqişənin izlərinin aradan qaldırılması istiqamətində səylərini davam etdirəcək.
Sülh danışıqlarına gəlincə isə, Kaya Kallas əlavə edib ki, iki ölkə arasında münasibətlərin gücləndirilməsi, sülh sazişinin dayanıqlı və davamlı olması istiqamətində göstərilən səylərə Avropa İttifaqı olaraq dəstəyini ifadə edir: "Sülh sazişinin mətn hissəsinin razılaşdırılmasını məmnuniyyətlə qarşılayıram və ümid edirəm ki, növbəti addımlar daha məhsuldar olacaq" deyən Kaya Kallasın səfəri və Prezidentlə görüşü Azərbaycan-Aİ əlaqələrində dönüş nöqtəsi kimi qiymətləndirilə bilər.
Bir sözlə, Avropa İttifaqının Xarici siyasət və təhlükəsizlik məsələləri üzrə ali nümayəndəsinin bu səfəri ikitərəfli münasibətlərdə yeni səhifə açdı və onu yeni səviyyəyə qaldırdı, desək yanılmarıq.
Onu da vurğulamaq yerinə düşər ki, Azərbaycan hər zaman beynəlxalq təşkilatlarla qarşılıqlı, ikitərəfli münasibətlərin inkişafında maraqlı olub və bu istiqamətdə müsbət addımlar atıb. Lakin Azərbaycanın Cənubi Qafqazdakı liderliyi, əldə etdiyi uğurlar bəzi Qərb dairələrində, beynəlxalq təşkilatlarda qıcıq hissi yaradıb. Xüsusən də, İkinci Qarabağ müharibəsindəki Şanlı Zəfərimizdən sonra Azərbaycana qarşı edilən basqılar, təzyiqlər bunun bariz təcəssümüdür.
Avropa İttifaqının son addımı bir daha sübut edir ki, artıq Qərb təsisatları da Azərbaycanın reallıqları ilə, regionda yaratdığı vəziyyətlə barışırlar və Prezident İlham Əliyevin sülh gündəliyini təqdir edirlər.
Rəşad BAXŞƏLİYEV,
"Azərbaycan"
jpg_1747392539.jpg)
