Azərbaycan Hesablama Palatasının auditoru Hilal Hüseynov Birləşmiş Ərəb Əmirliklərinin Əbu-Dabi şəhərində “Dövlət auditində süni intellekt” mövzusunda keçirilmiş beynəlxalq konfransda iştirak edib.
Hesablama Palatasından AZƏRTAC-a bildirilib ki, EUROSAI-ın prezidentliyi, İsrail Dövlət Müfəttişi və Ombudsmanı Ofisinin təşkilatçılığı ilə keçirilən konfransda Birləşmiş Ərəb Əmirlikləri (ev sahibi), Azərbaycan, Albaniya, Bəhreyn, Braziliya, Ekvador, Estoniya, Fransa, İtaliya, Qazaxıstan, Latviya, Malta, Şimali Makedoniya, Paraqvay, Rumıniya, Slovakiya, İsveçrə və Amerika Birləşmiş Ştatları ali audit orqanlarının nümayəndələri iştirak edib. Bununla yanaşı, Avropa Auditorlar Məhkəməsi (ECA) və İnformasiya Sistemləri Auditi və Nəzarəti Assosiasiyası (ISACA) kimi beynəlxalq təşkilatlar da konfransda təmsil olunub.
Konfrans İsrail Dövlət Müfəttişi və EUROSAI Prezidenti Matanyahu Englman açılış nitqi ilə başlayıb.
Sonra ABŞ Hökumətinin Hesabatlılıq Ofisinin nümayəndəsi dövlət auditində süni intellekt texnologiyalarının tətbiqinə dair təqdimatla çıxış edib. Daha sonra “Süni intellekt dövründə dövlət auditinin rolu” mövzusunda panel müzakirələr keçirilib, süni intellekt əsaslı audit həlləri və platformaları təqdim etdirilib.
Konfransın ikinci günündə audit sahəsində süni intellekt üzrə sertifikatlaşdırma proqramları, bu sahədə paralel audit təşəbbüsləri, auditorların ixtisaslaşdırılması və beynəlxalq əməkdaşlıq məsələləri müzakirə edilib, iştirakçı ölkələrin AAO-larının nümayəndələri ilə təcrübə mübadiləsi aparılıb.
Tədbir çərçivəsində BƏƏ Hesabatlılıq Təşkilatının Audit Sektorunun Baş direktoru Wael Abdulqader Mahmoud ilə rəsmi protokol görüşü də keçirilib.
jpg_1773043855.jpg)
