Onlardan ikisi sağ qalmışdır
Xəbər verildiyi kimi, dekabrin 25-də Bakı-Qroznı reysini yerinə yetirən "Azərbaycan Hava Yolları" aviaşirkətinə məxsus "Embraer 190" təyyarəsi təcili eniş zərurəti ilə bağlı Aktau şəhəri istiqamətinə yön alarkən həmin şəhərin yaxınlğında qəzaya uğramışdır. Təyyarənin göyərtəsində 62 sərnişin, 5 ekipaj üzvü olmaqla ümumilikdə 67 nəfər olmuşdur.
Baş vermiş qəza ilə əlaqədar Prezident İlham Əliyevin tapşırığına əsasən, hadisənin səbəblərinin araşdırılması üçün Baş nazir Əli Əsədovun sədrliyi ilə Dövlət Komissiyası yaradılmışdır. Dövlət başçısının tapşırığı ilə fövqəladə hallar və rəqəmsal inkişaf və nəqliyyat nazirlərinin rəhbərlik etdikləri heyət Qazaxıstana yola düşmüşdür. Nazirlər hadisə yerində müşahidə aparmış, xəstəxanada yaralılarla görüşmüşlər. Bundan başqa, hadisə baş verdiyi andan Azərbaycanın Aktau şəhərindəki Baş Konsulluğu hadisə yerində fəaliyyətə başlamış, Qazaxıstan tərəfi ilə əlaqəli şəkildə işbirliyi quraraq operativ tədbirlər görməyə başlamışdır.
Qəzada xəsarət alanlardan biri də Gəncə sakini Toğrul Cəfərovdur. Toğrulun atası Mahir Cəfərov deyir ki, qəzadan sonra oğlu ailəsi ilə əlaqə saxlayaraq vəziyyətinin yaxşı olduğunu bildirib. 32 yaşlı Toğrul hadisədən sonra Aktau xəstəxanalarından birinə yerləşdirilib. Atasının sözlərinə görə, o, hadisə barədə 11 radələrində eşidib: "Həmin an oğlumla əlaqə yaratdım. O, vəziyyətinin stabil olduğunu və elə bir xəsarət almadığını söylədi. Bir müddətdən sonra evə gəlib əl telefonu ilə yenidən oğlumu görüntülü yığdım. Danışıq zamanı həkimlərin ona yüksək səviyyədə tibbi xidmət göstərdiklərini dedi. Bundan başqa, Aktau vətəndaşlarının xəstəxanaya gələrək yaralılara qan verdiklərini söylədi".
Xəsarət alanlar arasında Şəmkir rayonunun Sarıtəpə kənd sakini, 1998-ci il təvəllüdlü Zamin Alıyev də var. Anası Güllü Alıyeva oğlu barədə bunları bildirdi: "Oğlum Qroznıya işləməyə gedirdi. Bakı Hava Limanına çatanda evə zəng etdi ki, nigaran qalmayın. Bir neçə saata təyyarə yola düşəcək. Bundan sonra oğlumla əlaqə saxlaya bilmədim. Bir də eşitdim ki, təyyarə qəzaya uğrayıb. Elə bil dünya başıma uçdu. Sonra öyrəndim ki, qəzada oğlum elə bir xəsarət almayıb. Sevincimin həddi-hüdudu yox idi. Lakin qəza zamanı çoxlu sayda yaralının, eləcə də həlak olanların olduğunu eşidəndə qanım bərk qaraldı. Allah qəzada həlak olanlara rəhmət eləsin, yaralılara isə cansağlığı arzulayıram".
Dekabrın 25-də qəzaya uğrayan təyyarənin sərnişinlərindən biri də Şəmkir rayonunun Yuxarı Seyfəli kənd sakini, 1998-ci il təvəllüdlü Ramin İbrahimovdur. Atası Mahir İbrahimov deyir ki, oğlu Çeçenistana işləməyə gedirmiş: "Saat 8-də bizə mesaj göndərdi ki, gömrükdən keçmişəm, artıq yola düşmək ərəfəsindəyik. Bir neçə saatdan sonra eşitdik ki, təyyarə qəzaya düşüb və çoxsaylı həlak olanlar və yaralananlar var. Oğlum Ramin həlak olanlar arasında idi".
Sabir ƏLİYEV,
"Azərbaycan"
