Yanvarın 16-dan martın 8-dək Fransada keçiriləcək illik siyahıyaalmada 9 milyon vətəndaş iştirak edəcək. Builki kampaniyanın 30 sualdan ibarət sorğusuna distant iş rejimi, əlillik vəziyyəti və valideynlərin doğum yeri ilə bağlı üç yeni sual əlavə edilib.
AZƏRTAC xəbər verir ki, Fransanın Milli Statistika və İqtisadi Araşdırmalar İnstitutu (Insee) və hüquq müdafiəçisi Kler Hedon xüsusilə valideynlərinin doğum yeri ilə bağlı sualın vacib olduğunu bildirib. Onların fikrincə, bu məlumat mənşəyə əsaslanan ayrı-seçkilikləri və bərabərsizlikləri üzə çıxarmağa kömək edəcək, ictimai siyasətin daha səmərəli qurulmasına imkan verəcək.
Bununla belə, İnsan Hüquqları Liqası (LDH), İrqçiliklə Mübarizə və Xalqlar arasında Dostluq Hərəkatı (MRAP) və bir neçə həmkarlar ittifaqı (CGT, FSU və Solidaires) bu yeniliyin əleyhinədir. Onlar valideynlərin mənşəyinə dair sualın siyahıyaalma üçün məqsədəuyğun olmadığını və bu məlumatların yanlış istifadə edilməsi ehtimalının mövcudluğunu vurğulayırlar.
Belə ki, tərəflər arasında mübahisə əsasən bu məlumatların diskriminasiya ilə mübarizə üçün vacibliyi və eyni zamanda potensial təhlükələri ətrafında cəmləşir. “Valideynlərin coğrafi mənşəyi məsələsi siyahıyaalmada faydasızdır, çünki bu, dövlət siyasətinin tətbiqi ilə əsaslandırılmır”, - deyə LDH-in üzvü Jan Robert Suesser bildirib. Qeyd edib ki, siyasətçilər bu mövzuda kifayət qədər məlumata malikdirlər.
Əvvəlki siyahıyaalmalarda artıq respondentlərin doğum yeri və xaricdə doğulublarsa, Fransaya gəliş tarixi kimi məlumatların toplandığını deyən R. Suesser valideynlərin mənşəyinə dair sualın əlavə olunmasını təhlükəli hesab edib. Onun fikrincə, bu sual immiqrantların yox, onların nəslindən olan şəxslərin coğrafi bölgüsü haqqında dəqiq məlumatı təmin edəcək və bu, potensial olaraq ayrı-seçkiliyə yol açacaq. Belə məlumatlar müəyyən qrupların seçilib hədəfə alınmasına, ictimai qorxuların artırılmasına və manipulyasiyalara səbəb ola bilər.
