Fransada doğum səviyyəsində ciddi azalma müşahidə olunur. Son 15 ildə ölkədə bu say 24% azalıb.
AZƏRTAC xəbər verir ki, Planlaşdırma üzrə Ali Komissarlığın (Haut commissariat au plan) yayımladığı hesabatda bu narahatedici tendensiyanın nəticələri barədə xəbərdarlıq edilir.
Milli Statistika və İqtisadi tədqiqatlar İnstitutunun (INSEE) məlumatına görə, 2024-cü ilin mayında ilk dəfə olaraq II Dünya Müharibəsindən sonra Fransada təbii əhali artımı mənfi olub. Yəni, ölkədə ölənlərin sayı doğulanlardan çoxdur.
İqtisadçılar bildirirlər ki, bu, daha az sosial sığorta ödəyicisi deməkdir. Əvvəllər gənc və bol işçi qüvvəsi ilə fəxr edən Fransa artıq bu reallığı itirir.
Ali Komissarlığın hesabatında deyilir ki, əhalinin və işçi qüvvəsinin azalması ilə mübarizə aparmaq üçün bir neçə istiqamət mövcuddur:
- Cəmiyyətin kollektiv şəkildə daha uzun və daha intensiv işləməsi tələb olunur. Bu, həm iş saatlarının artırılması, həm də təqaüd yaşının yüksəldilməsi ilə mümkün ola bilər;
- Avtomatlaşdırma: xüsusilə bəzi sahələrdə (sənaye, logistika, xidmət sektoru) texnologiyadan və robotlardan istifadə edərək kadr çatışmazlığının qarşısını almaq mümkündür;
- İşçi miqrasiyası: Hesabatda Almaniya və İtaliya kimi ölkələrin təcrübəsinə istinad edilərək, xarici işçi qüvvəsinə açıq strategiyanın hazırlanması tövsiyə olunur.
Planlaşdırma üzrə Ali Komissarlıq xəbərdarlıq edir ki, əgər doğum səviyyəsi bu templə aşağı düşməyə davam edərsə, Fransanın iqtisadi gələcəyi ciddi sual altına düşəcək. Vergi və sosial ödəniş sistemləri işçi qüvvəsinin azalması ilə zəifləyə bilər.
Bu səbəbdən istiqamətli, uzunmüddətli və kompleks bir strategiya hazırlanmalı, hökumət əmək bazarını, texnoloji imkanları və immiqrasiya siyasətini birlikdə nəzərdən keçirməlidir.
