BMT-nin İqlim Dəyişmələri üzrə Çərçivə Konvensiyası Tərəflər Konfransının 29-cu sessiyasının (COP29) Azərbaycanda keçirilməsi ölkəmizin beynəlxalq nüfuzuna yüksək etimadın göstəricisidir. Sözsüz ki, BMT belə bir ciddi qərar qəbul edən zaman  Azərbaycanın ekoloji problemlərlə bağlı bir çox konvensiya və sazişə qoşulmasını, müxtəlif ölkələrlə qarşılıqlı əməkdaşlıq əlaqələri yaratmasını, bu sahədə çoxşaxəli fəaliyyət proqramları qəbul etməsini nəzərə almışdır. 

Ölkəmizdə ətraf mühitin qorunmasını nəzərdə tutan zəruri qanunvericilik sistemi formalaşdırılaraq səmərəli institusional mexanizmlər və investisiya mühiti yaradılmışdır. Hazırda "yaşıl enerji" layihələrinin həyata keçirilməsi, alternativ və bərpaolunan enerji mənbələrindən istifadə, ətraf mühitə mənfi təsirlərin qiymətləndirilməsi və aradan qaldırılması istiqamətində çox ciddi işlər görülməkdədir. Azərbaycanda 2024-cü il "Yaşıl dünya naminə həmrəylik ili" elan olunub. İqlim dəyişmələri və ekoloji problemlər ilə hamılıqla mübarizə aparmaq üçün dünyada beynəlxalq təhlükəsizliyin, sülh və əmin-amanlığın təmin edilməsi vacib amillərdən biridir. Ölkəmiz yaxın tarixi keçmişdə əsassız ərazi iddialarına məruz qalaraq, ədalətsiz müharibəyə cəlb edilərək, bu qanlı savaşın ağır fəsadlarını yaşayıb. 2020-ci il sentyabrın 27-də Ermənistanın növbəti təxribatı ilə başlayan Vətən müharibəsi torpaqlarımızın işğaldan azad olunması ilə yekunlaşıb. Qısa zaman ərzində Ermənistan ordusunun təcavüzü nəticəsində xarabazara çevrilmiş şəhər və kəndlərimizdə sürətli abadlıq və quruculuq işlərinə start verilib. Görülən təxirəsalınmaz tədbirlər nəticəsində keçmiş məcburü köçkünlərin doğma yurdlarına qayıdışı başlanılıb. Bölgədə ekoloji tarazlığı bərpa etmək istiqamətində "yaşıl iqtisadiyyat"a, bərpaolunan enerjiyə əsaslanan genişmiqyaslı yenidənqurma işlərinə start verilib...

44 günlük Vətən müharibəsində qazanılan möhtəşəm qələbəmiz, regionda aparılan genişmiqyaslı bərpa və quruculuq işləri illərdir ki, Ermənistandan mənfur məqsədləri üçün istifadə edib regionda  müharibə alovunu körükləyən  böyük dövlətlərin, xüsusilə Fransanın qısqanclığına səbəb olub. Əsas işi regionda sülhə, əmin-amanlığa mane olmaq məqsədilə gərginlik yaratmaq, Ermənistanı silahlandırıb yenidən Azərbaycana qarşı müharibəyə təhrik etməyi qarşısına məqsəd qoyan  Fransa prezidenti Emmanuel Makron əvvəlcə iki ölkə arasında gedən sülh danışıqlarında "vasitəçi" qılığına girib prosesi pozmağa çalışdı. İstədiklərinə nail ola bilmədiklərini gördükdə isə Fransa kimi bir dövlətin başçısı erməni lobbisinin sözçüsünə çevrilərək Azərbaycan əleyhinə aparılan çirkin kampaniyaya  "liderlik" etməyə başladı. 

Oyuncağı əlindən alınmış uşaq kimi cığallıq edərək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) Azərbaycanın sədrlik etməsini həzm edə bilməyən Makron bu mötəbər tədbirin gözdən salınması məqsədilə dəridən, qabıqdan çıxdı, bir sıra dövlət başçılarına tədbirə qatılmamaq barədə çağırışlar da etdi. Amma arzusu yenə də ürəyində qaldı. Bütün dünyanın nəzərləri Azərbaycana yönəldi. Dünyanın 196 ölkəsindən 72 mindən çox nümayəndə COP29-da iştirak etmək üçün Bakıya gəldi. 80 prezident, vitse-prezident və baş nazir çox fəal şəkildə liderlərin zirvə görüşündə iştirak etdi. Fransanın ölkəmiz əleyhinə hazırladığı bu oyun da baş tutmadı...

Emmanuel Makrondan başqa kimsə Fransanın bu dərəcədə nüfuzdan salınıb, beynəlxalq imicinə zərbə vura bilməzdi.

Azərbaycan XİN-dən verilən məlumata görə, Fransanın ölkəmizdəki səfiri Ann Buayon Xarici İşlər Nazirliyinə (XİN) çağırılaraq BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ərəfəsində və sessiya zamanı Fransanın Azərbaycan sədrliyinin hədəf alınmasına etiraz bildirilib.

Bundan başqa, səfirin diqqətinə Ermənistanın geniş şəkildə silahlanmasını həyata keçirən, militarizmi və revanşizmi təşviq edən Fransanın addımlarının sülh prosesinə zərbə olduğu çatdırılıb. XİN-in məlumatında Azərbaycanı hədəf alan, eləcə də normallaşma prosesini təhlükə altına salan bu addımlara son qoyulmasının Fransa tərəfindən təkidlə tələb olunduğu qeyd edilir.

Bu bir faktdır ki, dünyada ölkəmiz əleyhinə erməni lobbisinin sifarışlərini gerçəkləşdirmək istəyən muzdlu dəstəyə COP29-un işinə başladığı ərəfədə və bu günlərdə daha çox fəallıq göstərmək tapşırığı verilib.

COP29 konfransı başlayan zaman Fransanın xüsusi səyləri ilə Avropa Parlamentində sədrliyimizi əsassız şəkildə tənqid edən, ümumilikdə isə iqlim dəyişmələri ilə mübarizə sahəsində qlobal səylərimizə qarşı çevrilmiş qətnamənin qəbulundan tutmuş Azərbaycana qarşı çıxışları və qatı ermənipərəst mövqeyi ilə tanınan amerikalı konqresmen Frank Peloninin COP29-da iştirak etmək məqsədilə Bakıya gəlməsini qəti surətdə təsadüfi hesab etmək olmaz. Bu fakt göstərir ki, eyni mərkəzdən idarə olunan antiazərbaycançı şəbəkə COP29-un keçirildiyi günlərdə ölkəmizin beynəlxalq aləmdə artan nüfuzundan narahat olaraq daha "aktiv" fəaliyyətə keçiblər. Muzdlu dəstənin əsas simalarından biri Frank Peloni  ilə yanaşı, ermənipərəst senatorlar Ed Marki və Şeldon Uaythaus da COP29-da "iştirak" etmək üçün Bakıya gəliblər. Ermənipərəst  "cənablar" çox gözlətmədən  keçirdikləri brifinqdə söylədikləri qızışdırıcı fikirləri ilə özlərini ifşa etdilər. Yeganə məqsəd yüksək səviyyədə təşkil edilən  COP29-un gedişatına kölgə salmaq cəhdi idi.

Peloni hər zaman Azərbaycana qarşı böhtan kampaniyalarında, ölkəmizin əleyhinə qətnamələrin qəbul olunmasında fəal iştirak edib. Bu yaxınlarda 60 konqresmen tərəfindən imzalanaraq ABŞ Dövlət Departamentinə  ünvanlanmış bədnam sənədin altında da onun  imzası var. Frank Peloni ölkəmizdə ona olan münasibətdən də qəti surətdə xəbərsiz deyil. COP29 tədbiri çərçivəsində ölkəmizə gəlişi də heç səbəbsiz deyildi. Əgər o Azərbaycandan qaçmağa məcbur edilməsəydi, sözsüz ki, təxribat xarakterli əməlləri ilə tarixiləşməyə çalışacaqdı. Lakin əməlləri bumeranq kimi üstünə qayıtdı. Kütləvi informasiya vasitələri, QHT-lərin, vətəndaş cəmiyyətinin nümayəndələri ona layiq olduğu yeri göstərdilər. Göstərdilər ki, Azərbaycana qarşı şər-böhtan kampaniyası aparan hər kəs nifrətə layiqdir və kimliyindən asılı olmayaraq lazımi cavabını alacaq. F.Peloni heç bir tədbirdə iştirak etmədən, heç  kimlə görüşməyə cürət etmədən gecə saatlarında ölkəmizi tərk etdi. Əli ətəyindən uzun geriyə qayıtmaq məcburiyyətində qaldı. Aldığı sifarişi yerinə yetirə bilməyən, erməni lobbisinin əlində oyuncaq olan üzdəniraq konqresmen ABŞ-yə qayıdandan sonra "X" şəbəkəsində ermənilərə olan borcunu ödəyəcəyini bildirib. 

Frank Peloninin Bakıda başına gələnlər erməni lobbisinin digər muzdlu "qəhrəmanları"na da nəticə çıxarmaq üçün dərs oldu.

Elşən QƏNİYEV,

"Azərbaycan"