Afrika qitəsində iqtisadi təhlil və reytinqlər üzrə ixtisaslaşmış “The African Exponent” portalı ən ağıllı insanlara malik Afrika ölkələrinin siyahısını dərc edib.
AZƏRTAC xəbər verir ki, ilk beşlikdə Şimali Afrika ölkələri üstünlük təşkil edir. Bu da təhsil sahəsində müasir islahatların təsirini və qədim sivilizasiyalardan qaynaqlanan təqaüd ənənələrinin davamını əks etdirir.
Siyahının başında orta IQ göstəricisi 86,56 olan Mavriki dayanır. Ölkədə güclü dövlət siyasəti, çoxmədəniyyətli təhsilin strateji şəkildə birləşdirilməsi və akademik nailiyyətlərə hörmət edən milli mədəniyyət mövcuddur.
Mavrikidə savadlılıq səviyyəsi 100 faizdən artıqdır, fransız, hindi, ingilis və Çin dillərində tədris məktəb sisteminə müsbət təsir göstərir. Mavriki universitetləri həm də xarici tələbələri cəlb edir, ölkə tələbələri isə beynəlxalq səviyyədə orta göstəricilərdən yüksək nəticələr nümayiş etdirirlər.
İkinci yeri orta IQ göstəricisi 80,92 olan Liviya tutur. Uzun müddət davam edən daxili münaqişələrə baxmayaraq, Liviyanın yüksək IQ göstəricisi texniki təhsilə, xüsusilə neft mühəndisliyi, memarlıq və tibb sahələrinə yönəlmiş uzunmüddətli diqqətlə izah olunur. Ölkədə 2011-ci il inqilabına qədər pulsuz təhsil sistemi universitet səviyyəsinədək genişləndirilmişdi. Liviyalı gənclər intellektual mədəniyyətlərini gücləndirmək üçün yeni ideya və bacarıqlardan yararlanmaq məqsədilə əlavə beynəlxalq diplomlar almağa çalışırlar.
Üçüncü yerdə orta IQ göstəricisi 79,22 olan Tunis qərarlaşıb. Yenilikləri və intellekti ilə tanınan Tunis ali təhsil, texnologiya və elmə ciddi sərmayə yatırıb. Şimali Afrikada Tunis çoxsaylı STEM məzunları və yaxşı qurulmuş dövlət sistemi ilə özünü yüksək IQ göstəricisi olan ölkə kimi təqdim edir. Tunis gəncləri texnologiyaya daha çox maraq göstərir, tələbələri isə beynəlxalq akademik yarışlarda yaxşı nəticələr göstərirlər. Ölkədə rəqəmsal savadlılıq səviyyəsi sürətlə artır.
“The African Exponent”in ən ağıllı insanlara malik ölkələr siyahısına, həmçinin Sudan (orta IQ 78,87), Çad (78,87), Seyşel adaları (78,76), Seneqal (77,37), Komor adaları (77,07), Madaqaskar (76,79) və orta IQ göstəricisi 76,42 olan Uqanda da daxil edilib.
png_1765896393.png)
