Aprelin 7-də Milli Məclisinin deputatları Səməd Seyidov və Asim Mollazadə ilə Britaniya parlamentinin Lordlar Palatasında hakim Leyboristlər partiyasının üzvü lord Con Man arasında görüş baş tutub.

AZƏRTAC xəbər verir ki, Milli Məclisin Beynəlxalq münasibətlər və parlamentlərarası əlaqələr komitəsinin sədri, Azərbaycanın AŞPA-dakı nümayəndə heyətinin rəhbəri Səməd Seyidov görüşdə çıxış edərək Azərbaycanla Böyük Britaniya arasında mövcud olan siyasi və parlamentlərarası münasibətlərin əhəmiyyətini vurğulayıb. Əlavə edib ki, Azərbaycanın nümayəndə heyəti AŞPA-da Avropa Mühafizəkarlar Qrupunun tamhüquqlu üzvüdür və burada Böyük Britaniyanın nümayəndə heyətinin əksəriyyəti də təmsil olunur. Bu isə ikitərəfli əlaqələrlə yanaşı, çoxtərəfli əməkdaşlıq platformalarında da əməkdaşlığın möhkəmlənməsinə şərait yaradır. S.Seyidov vurğulayıb ki, beynəlxalq təşkilatlarda, xüsusilə AŞPA çərçivəsində birgə fəaliyyət iki ölkə arasında etimada əsaslanan münasibətlərin göstəricisidir. O, bu əlaqələrin gələcəkdə də dərinləşəcəyinə inamını ifadə edib.

Asim Mollazadə çıxış edərək iki ölkə arasında əməkdaşlığın tarixinə və perspektivlərinə toxunub. Bildirib ki, bu əməkdaşlığın əsası 1992-ci ildən etibarən atılıb və ötən müddət ərzində tərəflər bir çox mühüm sahələrdə, xüsusilə enerji məsələlərində uğurlu əməkdaşlıq həyata keçiriblər. Deputat qeyd edib ki, bu münasibətlər yalnız iqtisadi maraqlarla deyil, həm də ortaq geosiyasi baxışlarla möhkəmlənib. A.Mollazadə çıxışı zamanı Azərbaycanın keçmiş “şər imperiyası”ndan çıxmış bir ölkə olaraq digər regionlarda azadlıq və müstəqillik yolunda addımlayan tərəfdaşlarına dəstək verdiyini bildirib. O, Azərbaycanın yalnız regional deyil, eyni zamanda, beynəlxalq miqyasda demokratiya və azadlıq dəyərlərinin müdafiəsinə töhfə verdiyini vurğulayıb.

Deputat, həmçinin Azərbaycanın İsraillə münasibətlərinə toxunaraq bu əməkdaşlığın regionda sabitliyə və təhlükəsizliyə xidmət etdiyini qeyd edib. O, sovet dövründə yəhudi icmasının hüquqlarının müdafiəsində iştirak etdiyini, eləcə də Avropa Yəhudi Federasiyası və Almaniya, Fransa kimi ölkələrdəki diaspor təşkilatları ilə dostluq münasibətləri saxladığını qeyd edib. Deputat bildirib ki, Azərbaycan beynəlxalq tərəfdaşlıqlarını insan haqları, azadlıq və qarşılıqlı hörmət prinsipləri əsasında qurmağa davam edəcək.

Britaniya parlamentinin Lordlar Palatasında hakim Leyboristlər partiyasının üzvü lord Con Man görüşdə çıxışı zamanı bildirib ki, ölkələr arasında münasibətlərin inkişafı üçün liderlərin səfərləri və birbaşa müşahidələri xüsusi əhəmiyyət daşıyır. Onun sözlərinə görə, bir ölkəni yerində görmək, insanlarla ünsiyyətdə olmaq və oradakı ab-havanı birbaşa hiss etmək stereotipləri aradan qaldırmaq və reallığı daha dərindən anlamaq baxımından son dərəcə faydalıdır.

L.C.Man vurğulayıb ki, 24 illik parlament fəaliyyəti ərzində və ondan əvvəl Baş nazir Toni Bleyerin dövründə əsas komitələrdən birində katib kimi çalışdığı illərdə bu qənaətə gəlib - diplomatik münasibətlərdə şəxsi təmaslar və yerində müşahidə əvəzsiz rol oynayır.

Görüşdə qarşılıqlı maraq doğuran məsələlər ətrafında fikir mübadiləsi aparılıb.