Xəbər verildiyi kimi, Bolqarıstan Rusiya təcavüzünə qarşı müdafiədə Ukraynanı dəstəkləmək üçün yaradılan "istəklilər koalisiyası"nda iştirak etməkdən imtina edib. Ölkənin Fransada səfərdə olan yeni Baş naziri Rumen Radev Parisdə media nümayəndələrinə bildirib: "Bolqarıstanın yeri orada deyil".
O, Fransa Prezidenti Emmanuel Makrondan "istəklilər koalisiyası"na qoşulmaq üçün dəvət aldığını, lakin Parisə başqa bir səbəbdən - 14 iyulda qeyd olunan Fransanın milli bayramı - Bastiliya Gününün qeyd olunması üçün gəldiyini bildirib.
R.Radevin mövqeyi budur ki, Kiyevə hərbi yardım göstərmək silahlı münaqişəni uzadır və yalnız gücləndirilmiş diplomatik səylər eskalasiyaya son qoya bilər. Bolqarıstanın Baş naziri həmçinin bildirib ki, o, otən ay Sofiyanın "milli maraqlarını qorumaq" üçün Avropa İttifaqından rus pravoslav kilsəsinin rəhbəri patriarx Kirilə və "Lukoil"un keçmiş prezidenti Vahid Ələkbərova qarşı sanksiyalar tətbiq etməməyi tələb edib. İyunun 18-də keçmiş prezident Rumen Radevin Baş nazir kimi ilk dəfə qatıldığı Avropa Şurasının iclasında o, patriarx Kiril və V. Ələkbərov qara siyahıdan çıxarılmasa, rəsmi Sofiyanın 21-ci sanksiyalar paketinə veto qoyacağını bildirib.
Bu arada Polşanın Baş naziri Donald Tusk Parisdə Ukraynaya kömək etmək istəyən ölkələrin Zirvə görüşündən sonra bildirib ki, Polşa, Böyük Britaniya və Fransa qoşunları "istəklilər koalisiyası"nın ilk təlimlərində iştirak edəcəklər. Təlimlər bu payız Polşada keçiriləcək. Donald Tusk bildirib ki, hərbi təlimlər Kiyevi dəstəkləyən bir qrup ölkəni sülh razılaşması və ya atəşkəs əldə edildikdən sonra "Ukrayna, eləcə də bütün region üçün konkret təhlükəsizlik zəmanətləri" təmin etməyə hazırlamaq məqsədi daşıyır. Eyni zamanda Tusk Ukraynada tezliklə sülhün bərqərar olacağını gözləmədiyini qeyd edib. Baş nazirin dediyinə görə, Rusiya Prezident Vladimir Putinin rəhbərliyi altında münaqişəni ən azı qışa qədər uzadacaq. Donald Tusk jurnalistlərə bildirib: "Rusiya və Putinin sərt mövqeyi nəzərə alınmaqla, hazırda yaxın gələcəkdə atəşkəs və ya sülh razılaşmasının əldə edilməsi ehtimalı azdır". O əlavə edib ki, indiki vəziyyətdə daha çox Rusiyanın hücumlarının artması ehtimal olunur.
Rizvan CƏFƏROV,
"Azərbaycan"
jpg_1784557816.jpg)
