Beynəlxalq Münasibətlərin Təhlili Mərkəzinin (BMTM) şöbə müdiri Şahmar Hacıyev dekabrın 3-5-də Çin Xalq Respublikasına səfəri çərçivəsində bir sıra yüksəksəviyyəli beynəlxalq tədbirlərdə iştirak edib.
Mərkəzdən AZƏRTAC-a bildirilib ki, dekabrın 3-də Ş.Hacıyev Şanxay şəhərində keçirilən “Üçüncü Qlobal Cənub Beyin Mərkəzləri Dialoqu”nda çıxış edib.
İqlim dəyişikliyi və beynəlxalq iqtisadi bərabərsizliyin Qlobal Cənubun qarşısında duran ən ciddi çağırışlar olduğunu bildirən Ş.Hacıyev Xəzər dənizində su səviyyəsinin enməsi ilə bağlı yaranmış ekoloji vəziyyətə də toxunub. O, sahilyanı dövlətlərin regional əməkdaşlığı dərinləşdirməsinin və adaptasiya tədbirlərini sürətləndirməsinin zəruriliyini vurğulayıb, həmçinin Çin və Azərbaycan arasında mövcud olan səmərəli strateji tərəfdaşlıqdan bəhs edib.
Ş.Hacıyev, eyni zamanda, Şanxay Beynəlxalq Araşdırmalar İnstitutları tərəfindən təşkil olunan “Yeni növ beyin mərkəzləri və Qlobal Cənub” adlı dəyirmi masada çıxış edərək, Azərbaycanda beyin mərkəzlərinin artan rolundan danışıb və Qlobal Cənub mövzuları üzrə akademik institutlar arasında daha dərin əməkdaşlığın vacibliyini qeyd edib.
Dekabrın 5-də isə BMTM-in şöbə müdiri Şanxay Beynəlxalq Araşdırmalar İnstitutları tərəfindən təşkil olunan “Dünya nizamı böhran içində: İslahat, yoxsa yenidənqurma?” mövzulu digər konfransda iştirak edib.
O, “Təhlükəsizləşdirilmiş dünyada qarşılıqlı asılılığın qorunması” mövzusundakı paneldə təhlükəsizləşdirmə prosesinin Azərbaycan kimi strateji mövqedə yerləşən ölkələr üçün doğurduğu nəticələr barədə danışıb. Bildirib ki, qlobal enerji böhranları fonunda Azərbaycanın etibarlı enerji təchizatçısı kimi rolu daha da önəm qazanıb. Bu mənada Cənub Qaz Dəhlizini xüsusilə qeyd edən Ş.Hacıyev layihənin təkcə iqtisadi əhəmiyyət daşımadığını, həmçinin Avropanın enerji təhlükəsizliyi arxitekturasının əsas sütununu təşkil etdiyini deyib. Vurğulayıb ki, Azərbaycan Günəş və külək enerjisi sahələrində öz layihə və ya xidmət çeşidini genişləndirir, yaranmaqda olan Xəzər-Qara dəniz dəhlizi vasitəsilə Avropaya yaşıl elektrik ixracına hazırlaşır.
jpeg_1792775507.jpeg)
