Şirvan şəhərinin Şəhidlər xiyabanında Birinci Qarabağ müharibəsində itkin düşmüş hesab olunan şəhid Rəhimov Cəmil Nizami oğlunun xatirəsi anılıb.
Şəhər rəhbərliyinin, regional təşkilatların, idarə və müəssisələrin əməkdaşlarının, şəhid ailəsi üzvləri və müharibə iştirakçılarının, şəhidin döyüş yoldaşları və ictimaiyyət nümayəndələrinin iştirak etdikləri tədbirdə çıxış edən ŞİH-nin başçısı İlqar Abbasov bildirib ki, şəhidlər bizim qürur yerimiz, fəxrimizdir, xalqımız heç zaman Vətən naminə canını qurban vermiş şəhidləri unutmayacaq, onları əbədi xatirə kimi qəlbində yaşadacaq. Qeyd edib ki, möhtəşəm Zəfərlə yekunlaşan 44 günlük Vətən müharibəsindən sonra itkin şəhidlərin nəşlərinin tanınması və ailələrinə təhvil verilməsi istiqamətində aparılan işlər şəhidlərimizin xatirəsinə olan ehtiramının nümunəsidir.
YAP Şirvan şəhər təşkilatının sədri Zahir Qəhrəmanov, Şirvan Şəhər Polis Şöbəsinin rəisi Seymur Əfəndiyev, DTX-nin Şirvan şəhər şöbəsinin rəisi Mehman Qasımov, SHXÇDX-nin Şirvan şəhər şöbəsinin rəisi vəzifəsini icra edən Ənvər Zərbəliyev, Şirvan şəhər Ağsaqqallar Şurasının sədri Fəxrəddin Rəhimov, şəhid ataları Alim Zülfüqarov və Rəhim Hüseynov şəhidlərimizin qəhrəmanlıq nümunələrindən danışıblar. Şəhidin döyüş yoldaşları isə Cəmil Rəhimovla bağlı xatirələrini bölüşüblər.
Qeyd edək ki, şəhid kiçik çavuş Cəmil Rəhimov 1969-ci il iyun ayının 5-də Sabirabad rayonunun Cəngən kəndində anadan olub. Azərbaycan Respublikasının ərazi bütövlüyünün müdafiəsi ilə əlaqədar 1992-ci il martın 4-də cəbhə xəttinə yola düşüb,1992-ci il mayın 8-də Şuşa uğrunda aparılan döyüş əməliyyatlarında itkin düşüb.
Azərbaycan Respublikası Əsir və İtkin Düşmüş, Girov Götürülmüş Vətəndaşlarla Əlaqədar Dövlət Komissiyası tərəfindən aparılmış araşdırmalar zamanı 33 ildir itkin düşmüş hesab olunan və yalnız bu il şəxsiyyəti müəyyənləşdirilən şəhidin nəşi Şirvana gətirilib, noyabrın 30-da şəhərdəki Şəhidlər xiyabanında dəfn edilib.
“Azərbaycan”
