Azərbaycan özünəməxsus, qədim və zəngin mədəniyyəti ilə dünyada tanınır. Bu, qiymətli irsin təbliği isə dövlətimizin və xalqımızın ən mühüm milli-mənəvi vəzifələrindən biri sayılır.
Ölkəmizin bir neçə minillik tarixə malik olan maddi və mənəvi mədəniyyəti yalnız regional deyil, qlobal miqyasda diqqət çəkir. Qobustan qaya təsvirlərindən tutmuş muğam sənətinə, xalçaçılıq ənənələrindən aşıq yaradıcılığına qədər çoxşaxəli irs həm xalqımızın kimliyini formalaşdırır, həm də dünya sivilizasiyasına böyük töhfələr verir. Məhz buna görə də milli dəyərlərin qorunması, öyrənilməsi və gələcək nəsillərə çatdırılması Azərbaycan dövlətinin prioritet istiqamətlərindən biridir. Bu məqsədlə həyata keçirilən layihələr, beynəlxalq tədbirlər, sərgilər və mədəniyyət proqramları Azərbaycanın zəngin irsinin dünyaya tanıdılmasına xidmət edir və ölkəmizin mədəni diplomatiyasını daha da gücləndirir.
Bu mənada, İslam Əməkdaşlıq Təşkilatının "İƏT Mədəniyyət Festivalı: Bakı Yaradıcı Həftə - 2025" ölkəmizin paytaxtında keçirilməsi növbəti uğurlu addım kimi dəyərləndirilməlidir.
Mədəniyyət və yaradıcı sənaye sahələrində əməkdaşlığın dərinləşdirilməsi, xalqlar arasında qarşılıqlı anlaşmanın və dostluq münasibətlərinin inkişaf etdirilməsi məqsədi daşıyan Mədəniyyət Festivalı İslam Əməkdaşlıq Təşkilatı (İƏT) tərəfindən 2019-cu ildən bəri müxtəlif üzv ölkələrdə təşkil olunur. Azərbaycan bu beynəlxalq tədbirə ilk dəfə evsahibliyi edir. "İƏT Mədəniyyət Festivalı: Bakı Yaradıcı Həftə - 2025" dekabrın 5-dən keçirilir. Tədbir dekabrın 11-dək davam edəcək.
Heydər Əliyev Fondunun tərəfdaşlığı, Azərbaycan Respublikası Mədəniyyət Nazirliyi və İslam Əməkdaşlıq Təşkilatının (İƏT) təşkilatçılığı ilə düzənlənən festival respublikamızın beynəlxalq mədəniyyət platformasında artan rolunu və regionda multikulturalizm, dialoq və əməkdaşlıq ənənələrinin təşviqinə verdiyi töhfəni bir daha nümayiş etdirir.
Festivalın açılış mərasimində çıxış edən Azərbaycan Respublikasının mədəniyyət naziri Adil Kərimli İslam Mədəniyyəti Festivalının Bakıda keçirilməsinin bütün islam dünyasından yaradıcı sənaye nümayəndələri üçün dialoq, tərəfdaşlıq və yeni ideyalar platforması rolunu oynayacağını qeyd edib: "40-dan çox ölkədən 300-dən artıq beynəlxalq iştirakçının, həmçinin 5 mindən çox ziyarətçinin gözlənildiyi bu tədbir yaradıcı sənaye sahəsində fəaliyyət göstərən bütün iştirakçıların əlaqələrinin genişlənməsinə və inkişafına mühüm töhfə verəcək, eyni zamanda ziyarətçilərə müxtəlif kreativ və innovativ həllər təqdim edəcək".
İƏT-in baş katibinin müavini və Əfqanıstan üzrə xüsusi nümayəndəsi Tarig Ali Bakhit Prezident İlham Əliyevin islam həmrəyliyinin möhkəmləndirilməsi yolunda göstərdiyi böyük dəstəyə görə təşəkkürünü bildirib. Qeyd edib ki, məhz bu möhkəm iradə və strateji yanaşma islam dünyasında əməkdaşlığımızın yeni mərhələyə keçməsinə ciddi töhfə verir: "Bu festival bizi mühüm platformada bir araya gətirərək birliyin, dialoqun və mədəni yaxınlaşmanın real təcəssümünə çevirir. İƏT-in katibliyi və bütün iştirakçı heyətin mədəni əlaqələrimizin dərinləşməsinə verdiyi dəstək qarşılıqlı dialoqun daha da güclənməsinə mühüm təsir göstərir. Bu kimi tədbirlər təkcə yaradıcılıq və mədəniyyət nümayişi deyil, həm də təşkilatımızı strateji baxımdan gücləndirən, ortaq dəyərlərimizi möhkəmləndirən vahid mədəni platforma yaradır. Belə bir platformanın formalaşması, təbii ki, gələcək fəaliyyətimizin daha sıx koordinasiyasına, qarşılıqlı anlayış və əməkdaşlığa xidmət edir".
Pakistan İslam Respublikasının federal milli irs və mədəniyyət naziri Aurangzeb Khan Khichi çıxışında diqqətə çatdırıb: "Bu tədbir bir daha nümayiş etdirir ki, ortaq tariximiz, mədəni köklərimiz və dini birliyimiz bizləri təkcə simvolik deyil, real tərəfdaşlıq ruhu ilə birləşdirir". Azərbaycanın mədəniyyət diplomatiyası sahəsində atdığı addımların, habelə regional və qlobal miqyasda mədəni əməkdaşlığa verdiyi töhfənin təqdirəlayiq olduğunu vurğulayan nazir qeyd edib ki, biz bu səmərəli fəaliyyətin davamlı olacağına və islam dünyasının mədəni identikliyinin daha da güclənməsinə xidmət ediləcəyinə inanır".
Türkiyənin mədəniyyət və turizm nazirinin müavini Nadir Alpaslan isə festivalın açılış mərasimində çıxışında vurğulayıb ki, İƏT Mədəniyyət Festivalı yalnız sənət təzahürü deyil, həm də xalqlarımız arasında mənəvi bağ, qarşılıqlı anlaşma və birgə tarixi yaddaşın gücləndirilməsi üçün mühüm vasitə olduğunu bir daha göstərir: "Azərbaycanın mədəni diplomatiya sahəsində nümayiş etdirdiyi liderlik isə regional həmrəyliyin formalaşmasına verdiyi töhfələr həm Türkiyə, həm də bütün islam dünyası tərəfindən yüksək dəyərləndirilir".
İƏT Mədəniyyət Festivalı proqramı zəngin və rəngarəngdir. Festival çərçivəsində İƏT üzv dövlətləri mədəniyyət nazirlərinin görüşü, "Mədəni və yaradıcı sənayelər forumu" (MYFORUM), "Creative Village": mədəni və yaradıcı sənayelər sərgisi" (MYEXPO), "Baku Cinema Breeze - 2025" beynəlxalq kino proqramı, "Şərq moda nümayişi" - İƏT ölkələrinin gənc və tanınmış dizaynerlərin təqdimatları, oyun texnologiyaları üzrə beynəlxalq sammit (G-HUB), eləcə də teatr, musiqi, rəqs və animasiya sahələri ilə bağlı müxtəlif səpkili mədəni layihələr planlaşdırılıb.
Festivalın davam etdiyi günlərdə təşkil olunan tədbirlərdə müzakirəyə çıxarılan və fikir mübadilələri aparılan mövzuların əhəmiyyəti, aktuallığı beynəlxalq əməkdaşlığın möhkəmlənməsində yeni imkanlar açır. Belə ki, dekabrın 8-də "İslam ölkələrində mədəniyyət sahəsində texnologiyaların inkişafı" (CulTech) mövzusunda panel sessiya bir sıra maraqlı çıxışlarla yadda qalıb. Həmin gün "Yaradıcı və mədəni sənayelərdə məşğulluq imkanları" adlı növbəti panel müzakirəsi zəngin yaradıcılıq ideyalarının necə uğurlu və dayanıqlı peşə fəaliyyətinə çevrilə biləcəyinə həsr olunub. Dekabrın 9-da oyun sənayesi üzrə beynəlxalq panel - "G-HUB: İƏT Ölkələrində Oyun Texnologiyalarının İnkişafının Yüksəlişi və Əməkdaşlıq İmkanları" təşkil olunub. Oyun sektorunun İƏT məkanında sürətlə artan potensialını dəyərləndirmək, regional bazarlar arasında əməkdaşlıq imkanlarını genişləndirmək və oyun istehsalının qlobal səviyyədə mövqeyini gücləndirmək panelin əsas məqsədi olub.
İƏT Mədəniyyət Festivalında mədəniyyətlərarası dialoqun inkişaf etdirilməsi, islam dəyərlərinin - tolerantlıq, sülh və müxtəlifliyə hörmətin təbliği əsas istiqamətlərdəndir. Həmçinin iqtisadiyyat, təhsil, elm və turizm sahələrində birgə layihələrin təşviqi, üzv dövlətlər arasında dayanıqlı tərəfdaşlıqların qurulması və yaradıcı sənayelərin qlobal iqtisadiyyata inteqrasiyasının gücləndirilməsi nəzərdə tutulub.
Zöhrə FƏRƏCOVA,
"Azərbaycan"
