Rumıniyanın “CaleaEuropeana” nəşri Avropa Komissiyasının Yaxın Şərqdə davam edən gərginliyə baxmayaraq, 2026-2027-ci ilin qış mövsümündə Avropa İttifaqında təbii qaz təchizatı ilə bağlı təhlükə görmədiyini yazıb.
AZƏRTAC xəbər verir ki, nəşrin məlumatına görə, Brüsseldə keçirilən Qaz Koordinasiya Qrupunun iclasında bildirilib ki, qaz anbarlarının doldurulması plan üzrə davam edir və üzv dövlətlər enerji təhlükəsizliyinin təmin olunması istiqamətində koordinasiyalı fəaliyyət göstərir. Bununla yanaşı, geosiyasi vəziyyət diqqətlə izlənilir və zərurət yaranacağı təqdirdə əlavə tədbirlər görüləcək.
Avropa Komissiyası hesab edir ki, qaz anbarlarının təxminən 80 faiz səviyyəsində doldurulması qarşıdakı qış mövsümündə Aİ-nin enerji təhlükəsizliyinin təmin edilməsi üçün kifayət edəcək.
“CaleaEuropeana” qeyd edir ki, Avropa İttifaqının enerji mənbələrinin şaxələndirilməsi siyasətində Azərbaycan mühüm yer tutur. Cənub Qaz Dəhlizi vasitəsilə Avropaya təbii qaz ixrac edən Azərbaycan Aİ üçün etibarlı enerji tərəfdaşlarından biri hesab olunur. Avropa Komissiyasının məlumatına əsasən, 2025-ci ildə Avropa İttifaqının qaz idxalının 4 faizi Azərbaycanın payına düşüb.
Nəşr vurğulayır ki, Avropa İttifaqı Azərbaycan da daxil olmaqla etibarlı tərəfdaşlarla əməkdaşlığı genişləndirməyi, qaz tədarük marşrutlarını şaxələndirməyi və yeni enerji layihələrini dəstəkləməyi davam etdirir. Bu baxımdan Cənub Qaz Dəhlizi Avropanın enerji təhlükəsizliyinin əsas sütunlarından biri kimi qiymətləndirilir.
“CaleaEuropeana” yazır ki, enerji mənbələrinin və nəqli marşrutlarının diversifikasiyası, eləcə də Azərbaycan kimi etibarlı tərəfdaşlarla strateji əməkdaşlığın inkişafı Avropa İttifaqının uzunmüddətli enerji təhlükəsizliyinin möhkəmləndirilməsində mühüm rol oynayacaq.
jpg_1787697209.jpg)
jpg_1787677426.jpg)
