Müasir beynəlxalq münasibətlər sistemində sülhün qorunması və münaqişələrdən sonrakı dövrdə dayanıqlı inkişafın təmin edilməsi dövlətlərin əsas prioritetlərindən biridir. Bu baxımdan Azərbaycanın Sülh Şurasına qoşulması təkcə ölkənin xarici siyasət xəttinin ardıcıllığını nümayiş etdirmir, eyni zamanda, Cənubi Qafqaz regionunda uzunmüddətli sabitliyin möhkəmlənməsinə mühüm töhfə verə bilər.
Bunu AZƏRTAC-a açıqlamasında Koaceli Heydər Əliyev Mədəniyyət Mərkəzinin sədri Bilal Dündar bildirib.
Onun sözlərinə görə, postmünaqişə dövrünü yaşayan region üçün əsas çağırışlardan biri qarşılıqlı etimadın bərpası və dialoq mühitinin formalaşdırılmasıdır.
“Azərbaycanın sülh platformalarında təmsil olunması beynəlxalq hüquqa əsaslanan mövqeyini daha geniş auditoriyaya çatdırmaqla yanaşı, regional problemlərin sülh yolu ilə həllinə dair konstruktiv yanaşmanı ön plana çıxarır. Bu isə Cənubi Qafqazda gərginliklərin azalmasına və qarşıdurma risklərinin minimuma endirilməsinə xidmət edir. Sülh Şurası çərçivəsində iştirak regional əməkdaşlıq üçün institusional imkanlar yaradır. Azərbaycan bu platformalar vasitəsilə reinteqrasiya, humanitar məsələlər və sosial-iqtisadi inkişaf sahələrində beynəlxalq təcrübədən yararlanmaq imkanı əldə edir. Xüsusilə azad edilmiş ərazilərdə aparılan genişmiqyaslı bərpa-quruculuq işləri, mina təhlükəsi ilə mübarizə və məcburi köçkünlərin geri qayıdışı proseslərində beynəlxalq tərəfdaşlığın gücləndirilməsi regionun ümumi inkişafına müsbət təsir göstərir. Eyni zamanda, sülh və sabitlik mesajı iqtisadi əməkdaşlıq üçün əlverişli mühit formalaşdırır”, - deyə Bilal Dündar vurğulayıb.
Mərkəzin sədri əlavə edib ki, regionda etibarlı təhlükəsizlik mühitinin mövcudluğu nəqliyyat-logistika dəhlizlərinin inkişafına, enerji layihələrinin genişlənməsinə və xarici investisiyaların cəlb olunmasına stimul verir, bu proseslər Cənubi Qafqazın beynəlxalq iqtisadi sistemdə rolunun artmasına şərait yaradır: “Azərbaycanın Sülh Şurasına qoşulması ölkənin beynəlxalq nüfuzunun möhkəmlənməsi baxımından da əhəmiyyətlidir. Sülh təşəbbüslərində fəal iştirak Azərbaycanı regional və qlobal miqyasda məsuliyyətli və etibarlı tərəfdaş kimi təqdim edir. Bu isə ölkənin diplomatik imkanlarını genişləndirərək, gələcəkdə regionda dialoq və əməkdaşlıq proseslərində təşəbbüskar mövqeyini gücləndirir. Beləliklə, Azərbaycanın Sülh Şurasına qoşulması Cənubi Qafqazda sabitliyin möhkəmləndirilməsi, qarşılıqlı etimadın artırılması və davamlı inkişaf üçün yeni perspektivlər açır. Bu addım regionun münaqişə sonrası mərhələdən əməkdaşlıq və tərəqqi mərhələsinə keçidini sürətləndirən mühüm siyasi-diplomatik təşəbbüs kimi qiymətləndirilə bilər”.
jpg_1790976482.jpg)
jpg_1791534016.jpg)
