Prezident İlham Əliyevin Sərəncamı ilə Naxçıvan Muxtar Respublikasının sosial-iqtisadi inkişafının sürətləndirilməsi üçün ümumilikdə 258 milyon manat həcmində maliyyə paketinin nəzərdə tutulması dövlətin Naxçıvana münasibətində uzunmüddətli, sistemli və mərhələli yanaşmanın növbəti praktiki ifadəsi kimi qiymətləndirilməlidir. Bu qərarın siyasi və iqtisadi mahiyyəti konkret layihələrin maliyyələşdirilməsindən daha geniş məna daşıyır. Söhbət Naxçıvanın ölkənin ümumi inkişaf modelinə daha sıx inteqrasiyasından, onun iqtisadi potensialının açılmasından və dəyişən regional geoiqtisadi şəraitdə strateji imkanlarının gücləndirilməsindən gedir.
Bu fikirləri AZƏRTAC-a açıqlamasında ekspert Əbülfəz Babazadə səsləndirib.
O bildirib ki, yeni maliyyə paketinin strukturu da dövlət siyasətinin prioritetlərini aydın şəkildə əks etdirir: “Sərəncam üzrə 66 milyon manat Tivi Su Elektrik Stansiyasının tikintisinin davamına, 70 milyon manat 26 yaşayış məntəqəsini birləşdirən 420 kilometr avtomobil yolunun əsaslı təmirinə, 25 milyon manat Naxçıvan Dövlət Universitetində 1000 yerlik tələbə yataqxanasının tikintisinə, 20 milyon manat beş yeni məktəbəqədər təhsil müəssisəsinin yaradılmasına, 53 milyon manat şəhərlərarası ictimai nəqliyyat parkının yenilənməsinə yönəldilir. Bundan əlavə yaşayış binaları və istilik təsərrüfatının əsaslı təmiri üçün ayrıca maliyyə nəzərdə tutulur. Bu bölgü göstərir ki, investisiya siyasətinin mərkəzində enerji, nəqliyyat, insan kapitalı, sosial infrastruktur və yaşayış mühitinin eyni vaxtda modernləşdirilməsi dayanır. Burada ən mühüm məqam inkişafın kompleks xarakteridir. Müasir regional siyasətdə yol çəkilməsi özlüyündə yekun məqsəd sayılmır. Keyfiyyətli yol istehsal və xidmət sektoruna çıxış yaradır, insanların mobilliyini artırır, kəndlə şəhər arasındakı iqtisadi əlaqələri genişləndirir. Enerji infrastrukturu investisiya və sənayeləşmə üçün baza formalaşdırır. Təhsil və məktəbəqədər infrastruktur insan kapitalının keyfiyyətini yüksəldir. İctimai nəqliyyatın yenilənməsi isə iqtisadi fəallıqla sosial rahatlıq arasında əlaqəni gücləndirir. Bu elementlər vahid sistem daxilində işlədikdə ayrılan dövlət vəsaitinin multiplikativ iqtisadi təsiri yaranır. Bu qərarın uzunmüddətli siyasi mənası həm də regional tarazlığın möhkəmləndirilməsi ilə bağlıdır. Azərbaycan son onilliklərdə regionların inkişafını paytaxt mərkəzli iqtisadi modelin alternativi kimi formalaşdırmağa çalışır. Azərbaycanın əsas hissəsi ilə Naxçıvan arasında yeni bağlantı perspektivlərinin, Orta Dəhlizin genişlənməsinin və regional nəqliyyat kommunikasiyalarının açılması gündəliyinin fonunda muxtar respublikanın daxili infrastrukturu gələcək yük və iqtisadi fəallıq üçün adekvat səviyyəyə çatdırılmalıdır. Prezident İlham Əliyev daha əvvəl Azərbaycanın əsas hissəsi ilə Naxçıvanı birləşdirəcək xəttin beynəlxalq tranzit imkanlarını genişləndirəcəyini və ilkin mərhələdə 15 milyon ton yükdaşıma qabiliyyətinə malik dəmir yolunun Orta Dəhlizin əsas arteriyalarından birinə çevriləcəyini vurğulayıb. Buna görə bugünkü sosial-iqtisadi yatırımların gələcək geoiqtisadi funksiyalar üçün daxili baza yaratdığını söyləmək mümkündür”.
Əbülfəz Babazadə vurğulayıb ki, 258 milyon manatlıq paketin əsas hədəfi Naxçıvanın iqtisadi və sosial dayanıqlığını gücləndirməkdir. “Lakin məhz güclü daxili infrastruktur Naxçıvanın gələcəkdə regional nəqliyyat, enerji və logistika layihələrində daha fəal iştirakının başlıca şərtlərindən biridir. Bu səbəbdən sosial inkişaf ilə geoiqtisadi rol arasında birbaşa strateji əlaqə formalaşır. Məşğulluq baxımından da qərarın təsirini bir neçə mərhələdə qiymətləndirmək olar. Tikinti və yenidənqurma layihələri ilkin mərhələdə birbaşa iş yerləri yaradır. İnfrastrukturun tamamlanması sonrakı mərhələdə özəl sektorun fəaliyyət imkanlarını genişləndirir, sahibkarlığın xərclərini aşağı salır, xidmət, logistika, turizm, kənd təsərrüfatı və sənaye üçün daha əlverişli mühit formalaşdırır. Dövlət Proqramının məşğulluq və rifahın yüksəldilməsi məqsədini ayrıca vurğulaması da bu yanaşmanın sosial nəticəyə istiqamətləndiyini göstərir. Nəticə etibarilə, 258 milyon manatlıq maliyyə paketi Naxçıvana yönəlmiş dövlət siyasətində kəmiyyət göstəricisindən daha çox keyfiyyət mərhələsini ifadə edir”,- deyə o qeyd edib.
677jpg_1790033437.jpg)
