Noyabrın 13-də Daşkənddə Özbəkistan Respublikası İnvestisiya, Sənaye və Ticarət Nazirliyinin təşkilatçılığı ilə Mərkəzi Asiya ölkələrinin Ticarət və İnvestisiya Nazirləri Şurasının ilk iclası keçirilib.
AZƏRTAC “UzA” rəsmi informasiya agentliyinə istinadla xəbər verir ki, tədbirin əsas məqsədi region ölkələri arasında ticarət, investisiya və sənaye əməkdaşlığı sahələrində praktik əməkdaşlığı gücləndirmək, eləcə də qarşılıqlı ticarət dövriyyəsinin artırılması və kooperativ sənaye sahələrinin inkişafı üçün birgə təşəbbüsləri təşviq etmək olub.
İclasda Özbəkistanın investisiya, sənaye və ticarət naziri Laziz Kudratov, Qazaxıstanın ticarət və inteqrasiya naziri Arman Şakkaliyev, Tacikistanın iqtisadi inkişaf və ticarət naziri Zavki Zavkizoda, Türkmənistanın ticarət və xarici iqtisadi əlaqələr naziri Nəzər Ağaxanov, Azərbaycanın iqtisadiyyat nazirinin birinci müavini Elnur Əliyev və Qırğızıstanın Özbəkistandakı səfiri Duyşonkul Çotonov iştirak ediblər.
Görüşü açan Laziz Kudratov iclasın Mərkəzi Asiya Dövlət Başçılarının 7-ci Məşvərət görüşü ərəfəsində keçirildiyini və regional iqtisadi əməkdaşlığın yeni səviyyəsinə doğru mühüm addım olduğunu vurğulayıb. O əlavə edib: “Ölkələrimiz güclü iqtisadi potensiala, təxminən 90 milyon əhaliyə, Şərqlə Qərb arasında strateji mövqeyə, inkişaf etmiş nəqliyyat şəbəkəsinə və zəngin resurs bazasına malikdir. Son illərdə Mərkəzi Asiya ölkələri və Azərbaycanın ümumi ÜDM həcmi 2,5 dəfədən çox artaraq təxminən 600 milyard dollara çatıb”.
Görüş zamanı tərəflər qarşılıqlı ticarətin və sənaye inteqrasiyasının genişləndirilməsinə yönəlmiş bir sıra tədbirləri müzakirə ediblər. Xüsusi diqqət region ölkələri arasında ticarət dövriyyəsinin 20 milyard dollara çatdırılması üçün vasitələrin, “Made in Central Asia” brendi altında birgə istehsal sahələrinin yaradılmasına, habelə infrastruktur və sənaye layihələrinin həyata keçirilməsində beynəlxalq maliyyə institutlarının və iri investorların cəlb edilməsinə yönəldilib.
Qeyd edilib ki, Özbəkistanla Mərkəzi Asiya ölkələri arasında iqtisadi-ticarət əməkdaşlığı davamlı artım nümayiş etdirir. Qarşılıqlı ticarət dövriyyəsi 2017-ci ildə 3,2 milyard dollar təşkil edirdisə, 2024-cü ilə qədər bu rəqəm 6,9 milyard dolları keçəcək. Cari ilin əvvəlindən bəri Özbəkistanın Azərbaycanla ticarətinin həcmi 13% artıb.
İclasın yekununa dair iqtisadi əməkdaşlığın dərinləşdirilməsi, iqtisadi-ticarət əlaqələrinin inkişafı, yeni investisiya vasitələrinin yaradılması və Mərkəzi Asiya brendinin beynəlxalq səviyyədə təşviqi ilə bağlı əsas razılaşmaları ehtiva edən birgə Kommünike imzalanıb.
jpeg_1773309701.jpeg)
jpg_1773307890.jpg)
