Avropa İttifaqı Azərbaycanın regional və qlobal proseslərdəki rolunu düzgün qiymətləndirir

Prezident İlham Əliyevin "Avropa Siyasi Birliyi"nin 7-ci Zirvə toplantısında iştirakı bunu təsdiqləyir

Danimarkanın paytaxtı Kopenhagen şəhərində "Avropa Siyasi Birliyi"nin 7-ci Zirvə toplantısı öz işinə başlayıb. Toplantıda Azərbaycan Prezidenti İlham Əliyev də iştirak edir.  Oktyabrın 1-dən Danimarkada işgüzar səfərdə olan dövlətimizin başçısı Kopenhagendə bir sıra görüşlər keçirib, "Avropa Siyasi Birliyi"nin 7-ci Zirvə toplantısının açılış mərasimində iştirak edib. 

"Avropa Siyasi Birliyi" (ASB) Avropa ölkələri arasında ən yüksək səviyyədə siyasi və strateji müzakirələr üçün yaradılmış əlaqələndirmə platformasıdır. Məqsədi ümumi maraq doğuran məsələlərin həlli üçün siyasi dialoqu və əməkdaşlığı inkişaf etdirmək, Avropa qitəsinin təhlükəsizliyini, sabitliyini və rifahını gücləndirməkdir. ASB Avropa İttifaqının üzvləri ilə yanaşı, qonşu ölkələri də əhatə edərək, 40-dan artıq dövləti bir araya gətirir.

ASB-nin 7-ci Zirvə toplantısında ümumilikdə 50-yə yaxın ölkədən dövlət və hökumət başçıları iştirak edir. Plenar iclaslarda və ondan sonra keçiriləcək "dəyirmi masa"larda Avropadakı ümumi təhlükəsizlik vəziyyəti, Rusiya-Ukrayna müharibəsi, iqtisadi təhlükəsizlik, miqrasiya, ənənəvi və hibrid təhlükələr kimi mövzular müzakirə olunur.

Hazırda dünyada gedən proseslər və çoxqütblü dünya düzəninin formalaşmağa başladığı şəraitdə məhz orta güc dövlətlərinin mövqeləri və ümumi güc balansında rolu artmaqdadır. Artıq qlobal güclərlə yanaşı, öz regionlarında sabitliyə, inkişafa və əməkdaşlığa mühüm töhfələr verən, həmçinin qlobal gündəliyə təsir imkanına malik olan ölkələr də beynəlxalq münasibətlərin qurucularına çevrilirlər. Azərbaycan da bu yeni reallıqda özünü müstəqil siyasət yürüdən, güclü milli iradəyə və strateji baxışa malik regional və orta güc kimi təsdiqləyib. 

Bu baxımdan Prezident İlham Əliyevin ASB-nin zirvə toplantılarında iştirakı həmişə siyasi mərkəzlər, politoloqlar və KİV tərəfindən maraqla izlənilir. Dövlətimizin başçısı indiyə qədər bir neçə dəfə ASB-nin toplantılarında iştirak edib. 

Ümumiyyətlə, Prezident İlham Əliyev Azərbaycanın üzvü olduğu beynəlxalq təşkilatlarla yanaşı, üzvü olmadığı təşkilatların da sammit, konfrans və görüşlərinə dəvət alır.  Sentyabrın 1-də Prezident İlham Əliyev Çin Xalq Respublikasının Sədri Si Cinpinin dəvəti ilə Şanxay Əməkdaşlıq Təşkilatının Sammitində iştirak etmişdi. İndi isə Prezident İlham Əliyev Danimarkanın Baş naziri Mette Frederiksenin və Avropa İttifaqı Şurasının prezidenti Antonio Koştanın dəvəti ilə ASB-nin 7-ci Zirvə toplantısında iştirak edir. Bu da həm dövlətimizin başçısının, həm də respublikamızın beynəlxalq münasibətlər sistemində malik olduqları yüksək nüfuzun bariz göstəricisidir. 

Prezident İlham Əliyevin Kopenhagendə Avropa İttifaqı Şurasının prezidenti Antonio Koşta və Avropa Komissiyasının prezidenti Ursula Fon der Lyayen ilə görüşü göstərdi ki, Avropa İttifaqı Azərbaycanın regional və qlobal proseslərdəki rolunu düzgün qiymətləndirir.

Xatırladaq ki, "Avropa Siyasi Birliyi" 6-cı Zirvə toplantısı bu ilin may ayında Albaniyanın paytaxtı Tirana şəhərində keçirilmişdi və Prezident İlham Əliyev də tədbirdə iştirak etmişdi. 

Rəşad CƏFƏRLİ,

"Azərbaycan"