Aqrar Sığorta Fondu fermerləri xəbərdar edir
Son günlər respublikanın müxtəlif bölgələrində vəhşi heyvanların, o cümlədən canavarların kəndlərə və təsərrüfatlara hücumları artıb. Hadisələr nəticəsində heyvanlar tələf olur və ya ağır xəsarət alırlar. Belə hallar xüsusilə qış və yaz aylarında təkrarlanır və fermerlərə ciddi maddi ziyan vurur.
Aqrar Sığorta Fondu (ASF) bildirir ki, Azərbaycanda dövlət dəstəyi ilə tətbiq edilən aqrar sığorta mexanizmi heyvandarlıq təsərrüfatlarını bu cür risklərdən qorumağa imkan verir. Mexanizm yalnız bitkiçilik və balıqçılıq sahələrini deyil, heyvandarlıq təsərrüfatlarını da əhatə edir. ASF bildirir ki, aqrar sığorta heyvanları təbiət hadisələri, yoluxucu xəstəliklər, ilan və həşərat sancması, vəhşi heyvan hücumları, üçüncü şəxslərin hərəkətləri və digər risklərdən qoruyur. Dövlət sığorta haqqının 50 faizini ödədiyindən, fermerlər cüzi məbləğlə təsərrüfatlarını sığortalaya bilərlər. Məsələn, 300 manatlıq qoyun və ya keçinin illik sığortası 7–11 manat, 1000 manatlıq mal-qaranın sığortası isə 24–39 manat təşkil edir.
Fərdi sığorta edən fermerlər artıq bu mexanizmin faydalarını görürlər. ASF-nin məlumatına görə, fəaliyyətə başladığı dövrdən indiyədək heyvandarlıq sığortası üzrə 3,5 milyon manat zərər ödənişi həyata keçirilib, təkcə bu ilin ilk 4 ayında isə 230 min manat kompensasiya ödənilib.
ASF fermerləri heyvanlarını risklərdən qorumaq və təsərrüfatlarını maliyyə itkisindən sığortalamaq üçün dövlət dəstəkli aqrar sığortadan yararlanmağa çağırır.
Züleyxa ƏLİYEVA,
“Azərbaycan
jpeg_1778601546.jpeg)
jpg_1778677574.jpg)
