ADA Universiteti Qazax Mərkəzində/Qazax Müəllimlər Seminariyasında Ümummilli Lider Heydər Əliyevin Anım Gününə həsr olunmuş tədbir təşkil edilib.
AZƏRTAC xəbər verir ki, tədbirdə seminariyada təhsil alan tələbələr, “Bir Müəllimin Manifesti” təhsil proqramının iştirakçıları, eləcə də Qazax və ətraf rayonlardan olan məktəblilər iştirak ediblər.
Açılış nitqi ilə çıxış edən ADA Universitetinin prorektoru, Qazax Müəllimlər Seminariyasının İdarə Heyətinin üzvü Vəfa Kazdal burada təqdim edilən azərbaycandilli ixtisaslar barədə məlumat verib. Seminariyanın müasir çoxşaxəli fəaliyyət istiqamətlərinə toxunarkən Vəfa Kazdal vurğulayıb ki, burada təhsil alan tələbələr, Mərkəzdə təqdim edilən proqramlarda iştirak etməklə peşəkar bacarığını artıran müəllimlər ənənə və dəyərlərimizin keşiyində duranlardırlar.
Ölkəmizin Gürcüstandakı səfirliyinin II katibi Ramiz Hacızadə soydaşlarımız üçün Azərbaycanın Dövlət Neft Şirkəti tərəfindən maliyyələşdirilən təhsil-təqaüd proqramından, ADA Universitetində təklif olunan proqramların Gürcüstanda təbliğindən bəhs edib.
ADA Universitetinin rektoru Hafiz Paşayev və tarix elmləri doktoru, I dərəcəli dövlət müşaviri Dilarə Seyidzadə Ümummilli Lider Heydər Əliyevlə bağlı “Xatirələrim” mövzusunda çıxış ediblər, iştirakçıların suallarını cavablandırıblar.
Tədbir çərçivəsində səyyah Azər Qəribin “Bir Səfərin İzi ilə - İtaliya” filminin nümayişi baş tutub. Film Ümummilli Liderin İtaliyaya rəsmi səfərinin qeyri-rəsmi tərəflərini əks etdirir.
Bununla yanaşı, Azərbaycanın Gürcüstandakı səfirliyinin dəstəyi ilə soydaşımız həvəskar rəssam, Qazax Müəllimlər Seminariyasının Təlim və Tədrisin təşkili üzrə magistratura proqramının tələbəsi Xəyalə Mustafayevanın Ümummilli Lider Heydər Əliyevə həsr olunmuş “Tarix Yazan İmza” mövzusunda rəsm sərgisi keçirilib.
