Prezident İlham Əliyevin Səudiyyə Ərəbistanının "Əl-Ərəbiyyə" telekanalına müsahibəsində ölkəmizin xarici siyasət kursu ilə bağlı mühüm məsələlər yer alıb. Regionda baş verən proseslər və ikitərəfli münasibətlərlə bağlı önəmli fikirlər səsləndirən Prezident İlham Əliyev türk dövlətləri ilə əməkdaşlığa da diqqət çəkərək qeyd edib ki, Türk Dövlətləri Təşkilatı hazırda böyük potensiala malikdir. Azərbaycan daim bu qurumu gücləndirməyə sadiq olub. Bu, bir növ məşvərətçi qrup, şura, ölkələr qrupu kimi fəaliyyətə başlayıb, sonra isə transformasiya edib. O, böyük potensiala malikdir.
"Türkiyə ilə bizim çox sıx münasibətlərimiz var və bu münasibətlər hazırda 2021-ci ildə Şuşada Prezident Ərdoğanla imzaladığımız, bizi hərbi və siyasi müttəfiqlər edən Bəyannaməyə əsaslanır. Bu, hüquqi cəhətdən təkcə hər iki ölkə üçün deyil, bütün türk dünyası üçün mühüm amildir. Keçən il biz Özbəkistanla müttəfiqlik münasibətləri haqqında müqavilə imzaladıq. Həmçinin Türk Dövlətləri Təşkilatının digər üzvləri ilə bizim strateji tərəfdaşlıq müqavilələrimiz və ya bəyannamələrimiz var. Beləliklə, bu, böyük potensialdır", - deyə dövlət başçısı vurğulayıb.
Milli Məclisin deputatı Zaur Şükürov qəzetimizə açıqlamasında bildirib ki, son illər Azərbaycanın türk dövlətləri ilə istər ikitərəfli formatda, istərsə də Türk Dövlətləri Təşkilatı çərçivəsində əlaqələrində intensivlik müşahidə edilməkdədir. Ortaq kök, dil, mədəniyyət, xüsusilə də təşkilatın bütün üzvlərində siyasi sabitlik, bir-biri və hamısı arasında dost əlaqələrin mövcud olması, həmçinin coğrafiya və zəngin təbii ehtiyatlar kimi mühüm faktorlar üzv ölkələr arasında siyasi, milli təhlükəsizlik, mülki müdafiə, iqtisadi-ticarət, enerji, nəqliyyat-logistika, kənd təsərrüfatı, mədəniyyət və digər sahələrdə çoxtərəfli əməkdaşlığın inkişafına imkan verir. "TDT-nin əsas fəaliyyət məqsədləri və vəzifələri Naxçıvan Sazişi ilə müəyyən edilmiş və tərəflər arasında qarşılıqlı etimadın möhkəmləndirilməsi, regionda və dünyada sülhün bərqərar edilməsi, xarici siyasət məsələlərinə ortaq yanaşmanın təşviq edilməsi, beynəlxalq terrorizm, separatçılıq, ekstremizm və transmilli cinayətkarlığa qarşı mübarizənin əlaqələndirilməsi, ortaq maraq kəsb edən bütün sahələrdə regional və ikitərəfli əməkdaşlığın gücləndirilməsi, ticarət əlaqələri və investisiyalar üçün əlverişli şəraitin yaradılması, hərtərəfli və balanslaşdırılmış iqtisadi yüksəlişə, sosial və mədəni inkişafa səy göstərilməsi, elm, texnologiyalar, təhsil və mədəniyyət sahəsində qarşılıqlı əlaqələrin genişləndirilməsi, kütləvi informasiya vasitələri arasında əlaqələrin, eləcə də daha geniş miqyasda informasiya mübadiləsinin təşviq edilməsi, hüquqi məlumatların mübadiləsinin, hüquq sahəsində əməkdaşlığın genişləndirilməsi kimi vacib müddəaları ehtiva edir. Azərbaycan Prezidenti cənab İlham Əliyevin praqmatik, uzaqgörən, prinsipial və müstəqil xarici siyasət kursu, ikitərəfli və çoxtərəfli münasibətlərdə daim beynəlxalq hüququn hamılıqla qəbul olunmuş prinsiplərinə və ədalətə, qarşılıqlı hörmətə əsaslanan mövqeyi Azərbaycanla türk dövlətləri arasında münasibətlərin inkişafında mühüm rol oynayır. Xüsusilə də, dövlətimizin başçısının böyük liderliyi və sərkərdəliyi, şəhidlərimizin, qazilərimizin, əsgər və zabitlərimizin qəhrəmanlığı sayəsində 2020-ci il Vətən müharibəsi və 2023-cü ildə 24 saatdan az müddətdə gerçəkləşdirilən antiterror tədbiri ilə özünün ərazi bütövlüyünü və tam suverenliyini bərpa edərək, son 80 ildə tam, mütləq qələbə qazanan yeganə ölkə olan Azərbaycana inam və etimad daha da artıb, istər ikitərəfli, istərsə də regional əməkdaşlıq və inkişaf üçün geniş imkanlar açılıb", - deyə o bildirib.
Deputat qeyd edib ki, məhz bunun nəticəsi olaraq, Prezident İlham Əliyevin avqustun 8-də Vaşinqtona işgüzar səfəri çərçivəsində Azərbaycanla türk dünyasını birləşdirəcək Zəngəzur dəhlizinin (TRIPP) açılması ilə bağlı mühüm razılaşma əldə edilməsi türkdilli ölkələr arasında coğrafi əlaqənin bərpa olunmasına imkan verməklə yanaşı, ümumilikdə türk dövlətlərinin inteqrasiyası prosesində əhəmiyyətli rol oynayacaq. Bütün sadalanan amillər ümumi ailəmiz olan türk dünyasının gələcəkdə daha qüdrətli və nüfuzlu siyasi və iqtisadi güc mərkəzinə çevriləcəyini deməyə əsas verir.
Əsmər QARDAŞXANOVA,
"Azərbaycan"
