Amma ermənilərin vandallığı heç vaxt ürəklərindən silinməyəcək

44 günlük Vətən müharibəsində erməni işğalçılarından azad edilən ilk yaşayış məntəqələrindən biri də Cəbrayıl rayonunun Mahmudlu kəndi oldu. Azərbaycan Ordusunun zabit və əsgərləri döyüşlərdə böyük hünər və qəhrəmanlıq göstərərək düşməni 4 oktyabr 2020-ci ildə bu yaşayış məntəqəsindən də qovub çıxardı. 

Qeyd edək ki, Mahmudlu kəndi Ermənistan silahlı qüvvələri tərəfindən 1993-cü ildə qəsb edilmişdi. Başqa işğal olunmuş yaşayış məntəqələri kimi erməni vandalları arxada qalan illər ərzində Mahmudlu kəndini də darmadağın edərək illərin xarabalığına çevirmişdilər. Kənddə uçurulmamış, dağıdılmamış bir ev, bir tikili belə qalmamışdı. Hər addımda, hər qarışda erməni separatçılarının qanlı izləri ürəkləri dağlayıb, göyüm-göyüm göynədir, qəlbləri sızıldadırdı. 30 ilə yaxın idi ki, bu ağrı-acı, bu göynərti kəsilmək bilmirdi.

İşğaldan azad olunan ilk illərdə bu yerlərdən keçəndə gördüklərimizdən gözlərimiz qan ağlayır, ovqatımız korlanırdı. Kənddəki evlərin daşı-daş üstə qalmamışdı. Həyətlərdəki ağacların çoxu susuzluqdan qurumuşdu. Məhəllələrin, evlərin ətrafını yabanı otlar, kol-kos basmışdı. Bu ürəkdağlayan mənzərələri gördükcə törətdiyi vəhşiliyə, vandallığa, barbarlığa görə erməni işğalçılarına lənətlər yağdırırdıq. 

2024-cü ilin yay aylarında növbəti dəfə kəndin yaxınlığından keçəndə başqa mənzərənin şahidi olduq. Gördüklərimizdən ürəyimiz açıldı, üzümüz güldü, gözümüz sevindi. İşğaldan azad olunmuş başqa yaşayış məntəqələrində olduğu kimi, Mahmudlu kəndində də quruculuq işlərinə başlanılmışdı. Keçmiş köçkünlərin geri dönüb yaşaması üçün gündən-günə iqtisadi gücü artan, dünyada söz sahibinə çevrilən Azərbaycan dövləti bu yaşayış məntəqəsində də yeni evlər tikirdi. Müasir quruluşda tikilən evlərin, məktəblərin, xəstəxanaların və bir sıra inzibati binaların bünövrələri qoyulurdu. İnşaat işləri çox sürətlə aparılırdı. Deməli, çox keçməyəcək ki, evlər hazır olacaq, kənd sakinləri doğma ocaqlarına qayıdıb ata-baba yurdlarında yaşayacaqlar. Ağrı-acılarla, həsrətlə dolu olan köçkünlük həyatlarına birdəfəlik son qoyacaqlar.

Bu günlərdə Laçına gedərkən Mahmudlu kəndində evlərin tikintisinin başa çatmaq üzrə olduğunu gördük. Fərəhdən gözlərimiz yaşardı, könlümüz telləndi. Artıq evlərin damları vurulmuş, qapı-pəncərələri yerinə qoyulmuş, divarlar rənglənmişdi. İnşaatçılar tikinti işlərinin son mərhələsini aparırdılar. Çox keçməyəcək ki, tikinti işləri başa çatacaq və kənd sakinləri Azərbaycan dövlətinə, Azərbaycan Prezidenti İlham Əliyevə minnətdarlıq hissi ilə sevinə-sevinə, gülə-gülə doğma ocaqlarına qayıdacaqlar. İnsanlarla bərabər doğma sakinlərini qoynuna alacaq torpağın da, daşın da üzü güləcək. Sevinc-sevincə qarışacaq, fərəh-fərəhə calanacaq. 

Ata-baba yurdlarına qayıdan sakinlər isə ilk günlərdən yorulmaq bilmədən doğma ocaqlarında abadlıq, təmizlik işləri aparacaqlar. Yeni ağac tingləri, gül kolları əkəcəklər, hər tərəf yaşıllığa, gül-çiçəyə bürünəcək. Ermənilərin işğal dövründə xaraba qoyduqları yerləri qısa müddət ərzində cənnətə döndərəcəklər. Uzun illərin sükutunu pozan kənddən doğma sakinlərin səsi gələcək. El geri dönəndən sonra toylar birinə-birinə qarışacaq. Çal-çağır səsi dağlarda, dərələrdə əks-səda verəcək. Evlərdən, həyətlərdən yeni dünyaya gəlmiş körpələrin qığıltısı eşidiləcək. Düşmənin uzun illər ərzində ürəklərə vurduğu yaralar yavaş-yavaş qaysaq bağlayıb sağalacaq. Amma erməni işğalı, erməni vandalizmi heç vaxt ürəklərdən, qəlblərdən silinməyəcək. Əbədi olaraq yaddaşlara köçüb qalacaq, həmişə nifrət hissi ilə xatırlanacaq.

V.MƏHƏRRƏMOV,

"Azərbaycan"