Yeni ilin yaxınlaşması ilə Bakı hər il olduğu kimi, bu dəfə də tamam başqa bir ovqatdadır. Şəhərin ritmi dəyişir, küçələrdə xoş əhval hiss olunur. 2026-cı ili qarşılamağa hazırlaşan Bakı yalnız təqvimdə bir rəqəmin dəyişməsinə deyil, həm də ümidlərin, arzuların və yeni başlanğıcların gəlməsinə hazırlaşır. Bu hazırlıq şəhərin hər guşəsində hiss olunur, ilk növbədə insanların üzündəki təbəssümdə.
Bakı bulvarından tutmuş mərkəzi prospektlərə qədər şəhərin əsas küçələri Yeni il işıqları ilə bəzədilib. Axşam düşən kimi minlərlə lampanın eyni anda yanması şəhərə nağılvari bir görünüş verir. İşıqlandırma təkcə estetik məqsəd daşımır, həm də qış gecələrinə istilik və canlılıq qatır. Prospektlər boyunca asılan işıqlı kompozisiyalar, ağacların üzərinə dolanan parlaq lentlər və binaların fasadlarında yaradılan işıq effektləri Bakını bir fərqli ritmə salır. Xüsusilə Dənizkənarı bulvarda əks olunan işıqlar Xəzərin üzərində əsrarəngiz mənzərə yaradır və şəhərin qış simvoluna çevrilir.
Yeni ilin rəmzi sayılan şam ağacları həm uşaqların, həm də böyüklərin maraq mərkəzinə çevrilib. Parlaq oyuncaqlar, klassik və müasir üslubda seçilmiş bəzəklər, işıqlı ulduzlar bu ağaclara xüsusi cazibə qatır. Paytaxt sakinləri və qonaqlar onların önündə şəkil çəkdirir və bununla Yeni ili qarşılamağın sevincini yaşayırlar. Şaxta baba və Qar qızla şəkil çəkdirən uşaqların həyəcanı, sevinci ölçüyəgəlməzdir. Bulvarda qurulmuş süni buz meydançası da daha çox diqqətçəkən ərazilərdəndir. Böyüklü-kiçikli bu ekstrimi yaşamağa cəhd edənlərin sayı tükənmək bilmir.
Yeni il yarmarkaları isə şəhərə əlavə bir ruh gətirir. Müxtəlif meydanlarda və açıq məkanlarda təşkil olunan bu yarmarkalar Bakının qış həyatını canlandırır. Hər il olduğu kimi, Fəvvarələr meydanında "Nargis" fondunun təşkilatçılığı ilə fəaliyyət göstərən "Soyuq əllər, isti ürək" xeyriyyə yarmarkası, bu ildən etibarən Dənizkənarı Milli Park ərazisində yaradılan yarmarka daha çox diqqət çəkir. Çay və qəhvənin ətri, bişirilən şirniyyatların qoxusu, yerli ustaların hazırladığı suvenirlər, Yeni il dekorları, hədiyyəlik əşyalar şəhər sakinlərinə və qonaqlara fərqli seçimlər təqdim edir. Yarmarkalar sadəcə alış-veriş məkanı deyil, eyni zamanda insanların bir araya gəlib vaxt keçirdiyi, bayram ovqatlarını paylaşdığı sosial ünvan kimi xarakterizə olunur.
Mağazaların vitrinləri də Yeni ilə xüsusi hazırlanır. Şaxta baba fiqurları, süni qar effektləri, qırmızı və qızılı tonlarda seçilmiş bəzəklər şəhərin ticarət həyatına bayram havası qatır. Axşam saatlarında işıqlanan vitrinlər Bakının küçələrini daha canlı və cəlbedici edir.
2026-cı ili qarşılayan Bakı həm ənənəyə sadiq qalır, həm də müasir üslubu qoruyur. Şəhər klassik Yeni il simvollarını müasir dizayn və texnologiya ilə birləşdirir. Bir sözlə, Bakı 2026-cı ili ümidlə, işıqla və birlik hissi ilə qarşılayır.
Nərminə ƏSGƏROVA,
İlham BABAYEV (foto),
"Azərbaycan"
jpg_1773441496.jpg)
