İqtisadi İslahatların Təhlili və Kommunikasiya Mərkəzinin "Azexport" portalı 2026-cı il üçün ilk ixrac sifarişini Amerika Birləşmiş Ştatlarının Kaliforniya ştatından qəbul edib. "Azexport" portalının rəhbəri Ayxan Qədəşov və Kaliforniyada yerləşən ticarət şəbəkəsinin rəhbəri Aleks Alşvenq arasında keçirilən onlayn təqdimat və müzakirələr nəticəsində bu barədə razılıq əldə olunub.
Mərkəzdən bildirilir ki, sifarişlər əsasən Azərbaycanda istehsal edilən emal olunmuş məhsulları, şirniyyat və qənnadı məmulatlarını, eləcə də bəzi milli kulinariya məhsullarını əhatə edir. Hazırda qəbul olunmuş sifarişlər üzrə beynəlxalq sertifikatlaşdırma, ABŞ tələblərinə uyğun etiketləmə, logistika və gömrük prosedurlarının təşkili istiqamətində zəruri işlər həyata keçirilir. Bu proseslərin məqsədi Azərbaycan məhsullarının Kaliforniya bazarına sistemli və davamlı çıxışını daha da möhkəmləndirməkdir.
Qeyd edək ki, "Azexport" portalı yerli istehsalçıların məhsullarının beynəlxalq alıcılara təqdim olunması, eləcə də onlayn platformalar vasitəsilə rəqəmsal reklam və marketinq kampaniyalarının həyata keçirilməsi üzrə fəaliyyət göstərir. Portalda qeydiyyat və təqdim olunan xidmətlər istehsalçılar üçün ödənişsizdir.
Məlum olduğu kimi, dünya bazarında məhsul satışı üzrə rəqabət getdikcə güclənir. Bu prosesdən qazanclı çıxmağın iki əsas şərti var - keyfiyyətli məhsul istehsal etmək və məhsulun alıcıya doğru-dürüst tanıdılması. Ölkəmizdə qeyri-neft sektorunda fəaliyyət göstərən sahibkarların buna daha çox ehtiyacı var. Çünki dünya bazarına məhsul çıxarmaq üçün onlar bir çox hüquqi və gömrük peosedurunu öyrənməli və onlara əməl etməlidirlər. Amma bu da reallıqdır ki, həmin sahədə fəaliyyət göstərən kiçik və orta sahibkarların belə bir imkanı yoxdur. "Azexport" portalının yaradılması da məhz buna xidmət edir. İqtisadi İslahataların Təhlili və Kommunikasiya Mərkəzinin operatoru olduğu "Azexport" portalı yerli istehsalçılara bu sahədə yardım göstərir. Portalın fəaliyyət göstərdiyi ötən dövrə diqqət yetirdikdə görürük ki, onun dəstəyi ilə qeyri-neft məhsulları ixracında mühüm addımlar atılıb. "Azexport" portalının nümayəndələri yerli sahibkarlara dəstək olmaq məqsədilə dünyanın müxtəlif yerlərində keçirilən mötəbər tədbirlərdə iştirak edərək ölkəmizdə istehsal olunan qeyri-neft məhsullarının ixracının tanıdılmasında önəmli rol oynayırlar. Bu günlər "Azexport" portalının rəhbəri Ayxan Qədəşov Polşanın Krakov şəhərində Milli Luis Universitetində "Yeni üfüqlər: Rəqəmsal iqtisadiyyat və dəyişən dünyaya cavablar" mövzusunda keçiriləcək konfransda təqdimatla çıxış edəcək. O, konfransda həmçinin 7 ölkənin nüfuzlu universitetlərinin nümayəndələrinə portal barədə məlumatlar verəcək.
Qeyd edək ki, İİTKM-in icraçı direktorunun müavini Ramil Hüseynli və "Azexport" portalının rəhbəri Ayxan Qədəşovun həmmüəllif olduqları və portalın fəaliyyətindən bəhs edən "Digital Trade, Government Policy, and Economic Growth: The Case of Azerbaijan" ("Rəqəmsal ticarət, hökumət siyasəti və iqtisadi artım: Azərbaycan nümunəsi") adlı məqalə konfransa təqdim edilib və uğurlu nümunə kimi qəbul olunub. Konfransın təşkilat komitəsi "Süni intellekt əsrində yeni iqtisadiyyat: imkanlar, risklər və cəmiyyətin transformasiyası" adlı panel müzakirəsində "Azexport" təcrübəsinin iştirakçılara təqdim edilməsinə qərar verib və müəlliflərə dəvət məktubu göndərib. Məlumat üçün bildirək ki, əsas təşkilatçıları Polşa, Bosniya və Herseqovina, Portuqaliya, Ukrayna, Bolqarıstan, Monteneqro, Sloveniya və Serbiyanın nüfuzlu universitet və elmi tədqiqat mərkəzləri olan konfransa təqdim edilən məqalədə "Azexport" portalının təqdim etdiyi imkanlardan, ölkəmizdə rəqəmsal ticarətin inkişafı istiqamətində fəaliyyətdən, xüsusən də yerli məhsulların ixracının asanlaşdırılmasında sözügedən portalın oynadığı roldan bəhs olunur.
Rüstəm KAMAL,
"Azərbaycan"
jpg_1768485517.jpg)
