Prezident İlham Əliyevin təşəbbüsü və rəhbərliyi ilə son illər ölkəmizdə böyük infrastruktur layihələri həyata keçirilib. Görülən işlər ölkəmizin inkişafına, xalqımızın rifahının yaxşılaşdırılmasına xidmət edir. Son 20 ildə qəbul edilən dövlət proqramları bütün regionlarımızı əhatə edib. Dövlət proqramlarının hamısı uğurla icra edilib.
Bakı Dövlət Universitetinin kafedra müdiri, professor Kamilə Əliyeva qəzetimizə açıqlamasında bildirib ki, Prezident İlham Əliyevin sədrliyi ilə yanvarın 12-də "Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026-2035-ci illər üçün Dövlət Proqramı"na həsr olunmuş müşavirədə bu barədə geniş bəhs olunub: "Prezident çıxışında Azərbaycanda enerji sahəsində həyata keçirilmiş böyük layihələr, eləcə də Bakı və Abşeron yarımadası ilə yanaşı, bölgələrimizin su təchizatının yaxşılaşdırılması üçün görülən tədbirlər və 10 il ərzində həyata keçiriləcək genişmiqyaslı layihələr barədə məlumat verdi. Enerji təchizatı ilə bağlı ölkəmiz yeni mərhələyə qədəm qoyub. Vaxtilə Azərbaycan digər ölkələrdən elektrik enerjisi idxal edirdi. Məhz cənab İlham Əliyevin uzaqgörən və düşünülmüş siyasəti sayəsində enerji istehsalı sahəsində misli görünməmiş layihələr reallaşdırıldı. Azərbaycanda inşa edilmiş günəş və külək-elektrik stansiyalarının tikilib istifadəyə verilməsi nəticəsində generasiya gücümüz tələbatımızdan artıq oldu. Artıq neçə ildir ki, Azərbaycandan Avropa ölkələrinə ixrac edilən neft və qaz bu dövlətlərin enerji təhlükəsizliyinə böyük töhfələr verir. Yaxın vaxtlarda Azərbaycan bir sıra Avropa dövlətlərinə elektrik enerjisi də ixrac edəcək".
Kamilə Əliyeva qeyd edib ki, Prezident İlham Əliyev çıxışında Azərbaycanda içməli su və suvarma layihələrinin icra olunduğu və bu işlərin daha da genişləndiriləcəyi barədə də məlumat verib. Son 20 ildə ölkəmizdə 4 böyük su anbarı inşa edilib. "Taxtakörpü" və "Şəmkirçay" su anbarlarının tikilməsi Bakının su təchizatındakı problemlərin aradan qaldırılmasında əhəmiyyətli rol oynayıb. Bakı və Abşeron yarımadasının içməli su ilə təchiz olunmasında "Ceyranbatan" su anbarı xüsusi əhəmiyyət kəsb edir. Bu su anbarı müasir təmizləyici qurğularla təchiz olunub. Ölkə rəhbərinin tapşırığına əsasən işğaldan azad edilmiş ərazilərdə də içməli su və suvarma layihələri icra edilir: "Ölkəmizin ən böyük su anbarlarından olan "Sərsəng" və "Suqovuşan" su anbarları yenidən qurulub. Ermənilərin torpaqlarımızı işğalda saxladığı zaman bu su anbarlarından ölkəmizə qarşı silah kimi istifadə edilirdi. Qışda ermənilər su anbarlarının suyunu açıb buraxır, yayda isə qarşısını kəsirdilər. "Sərsəng" və "Suqovuşan" su anbarları ilə yanaşı, Füzuli rayonunda "Köndələnçay", Ağdam rayonunda "Xaçınçay" su anbarları da yenidən istifadəyə verilib".
Ekspert Prezident İlham Əliyevin Bakı şəhəri və qəsəbələrində, Abşeron və Sumqayıt şəhərində içməli su təchizatı ilə bağlı görüləcək işlər barədə məlumat və müvafiq qurumlara tapşırıqlar verdiyini də xatırladıb. Qeyd edib ki, görülən işlər, həyata keçirilən bir çox layihənin icrası nəticəsində Bakı və Abşeron yarımadasında su problemi öz həllini tapmaqdadır. Lakin dövlət başçımızın da vurğuladığı kimi, bəzi problemlər hələ də qalır. "Dövlət proqramı bu problemlərin tamamilə həll olunması üçün hazırlanıb. On il müddətində icra olunması nəzərdə tutulan bu proqram icra edildikdən sonra vətəndaşlarımızın 95 faizi içməli su ilə təmin olunacaq. Bundan başqa, 30-a yaxın yeni su anbarının tikilməsi nəzərdə tutulub və sayğaclaşdırma 100 faizə çatdırılacaq", - deyə o əlavə edib.
Kamilə Əliyeva bildirib ki, yağış sularının idarə olunması üçün də Bakının 30 küçəsində yeni kollektor şəbəkəsinin quraşdırılması nəzərdə tutulub: "Son zamanlar güclü yağışlar zamanı Bakıda nəqliyyat iflic vəziyyətə düşür və bir sıra xoşagəlməz hadisələr yaşanır. Yeni kollektorların inşası Bakı şəhərində bu problemi tamamilə aradan qaldıracaq. Xəzər dənizinin çirkləndirilməsinin qarşısının alınması istiqamətində də tədbirlər həyata keçiriləcək. Hövsanla yanaşı bir neçə qəsəbədə inşa ediləcək sutəmizləyici qurğuların modelləşdirilməsi nəticəsində dənizə təmizlənmiş su axıdılacaq".
Ekspert vurğulayıb ki, dövlət proqramının ən önəmli hissələrindən biri ölkəmizdə duzsuzlaşdırma zavodunun inşa edilməsi layihəsidir. Xəzər dənizinin suyu duzsuzlaşdırıldıqdan sonra içməli su halına gətiriləcək. Bu zavodun tikilməsində dünyanın ən müasir texnoloji avadanlıqlarından istifadə ediləcək və əhalimiz keyfiyyətli, təmiz su ilə təmin olunacaq. Qeyd olunan dövlət proqramının qəbulu və həyata keçiriləcək işlər ondan xəbər verir ki, dövlət tərəfindən hər zaman vətəndaşın problemsiz, firavan həyat yaşaması üçün bütün lazımi tədbirlər görülür.
Əsmər QARDAŞXANOVA,
"Azərbaycan"
jpg_1768485517.jpg)
