Şirvan şəhərinin "Köhnə şəhər" hissəsində - Kür çayının sahilində yerləşən İsmət Qayıbov adına parkda yenidənqurma və əsaslı təmir işlərinin aparılması qərara alınıb.   
Tarixi mənbələrə görə, 1880-ci ildə salınmış parka sovet hakimiyyəti dövründə Leninin, 1991-ci ildə İsmət Qayıbovun adı verilmişdir. Park Nazirlər Kabinetinin 2 avqust 2001-ci il tarixli qərarı ilə ölkəəhəmiyyətli bağ, park, monumental və xatirə abidəsi kimi qeydiyyata alınmışdır.
Uzun illər 2,5 hektarlıq parkın ərazisində təmir işləri aparılmadığından onun yenidən qurulması və əsaslı təmir olunmasına kəskin ehtiyac yaranmışdır. Odur ki, həm parkın mövcud vəziyyəti, həm də şəhər əhalisinin çoxsaylı müraciətləri nəzərə alınaraq onun yenidənqurma layihəsi hazırlanmışdır.
Layihə əsasında parkın ərazisində 1200 kvadratmetrdən çox tamet daşların döşənməsi, 3 min paqonometrdən çox beton bordyurların düzülməsi, 5,5 min kvadratmetr  asfalt-beton örtük vurulması, 650 paqonometr kabel xəttinin və 865 paqonometr su xəttinin çəkilməsi, 40 işıq dirəyinin quraşdırılması, 30 müasir oturacağın və park informasiya lövhəsinin qoyulması, müxtəlif idman və uşaq-əyləncə qurğularının yerləşdirilməsi nəzərdə tutulur. 
Parkda müxtəlif növ ağac və gül kolları əkiləcək, gül kompozisiyaları yaradılacaqdır. Eyni zamanda parkın mövcud giriş hissəsi, istinad divarı, sanitar qovşağı əsaslı təmir olunacaq, səhnə və mədəni-kütləvi tədbirlər meydanı yaradılacaq.

Seyran CAVADOV,
"Azərbaycan"